Përpara ndeshjes së djeshme në kryeqytet, tifozët e Partizanit dhe të Tiranës u përlasën fizikisht ndërmjet tyre.
Shumë prej tifozëve mbetën të gjakosur, ndërsa është dashur edhe ndërhyrja e forcave të rendit.
Ndërkohë një grupim i tifozëve të Tiranës kishte organizuar edhe një skenar të frikshëm, që për fat të mirë nuk u realizua.
Sipas “Shqiptarja.com”, grupimi “Capital Crew”, kishte hapur tre gropa me një sasi lëndësh të konsiderueshme piroteknike me ndezje elektrike, për të goditur tifozët e Partizanit në tribunën përballë.
Ka qenë një polic i cili e ka zbuluar rastësisht planin e tifozëve të Tiranës.
Në lidhje me këtë ngjarje, janë shpallur në kërkim dy persona.
Ndërsa për aktet e dhunës është arrestuar 29-vjeçari Elton Bande, i cili kishte thyer arrestin shtëpiak.
Gjithashtu janë proceduar edhe 6 persona të tjerë.
Atmosfera në “Selman Stërmasi” nuk ishte aspak e qetë, për shkak të një banderole të tifozëve të Tiranës, ku shfaqeshin dy partizanë të varur në litar.
Si përfundim ndeshja u fitua nga të kuqtë me rezultatin 1-2, duke e rënduar situatën e Tiranës, e cila prej shumë kohësh nuk fiton një derbi.
