Me frikën se një tragjedi e dytë si ‘Gërdeci’ mund të përsëritet, banorët e “ Porto Romanos” kanë dalë në protestë. Ata i bëjnë thirrje qeverisë që të largojë depozitat e gazit nga lagjia e tyre, pasi rrezikohet jeta e mijëra banorëve.
Sipas banorëve është e treta herë që në zonë ka shpërthime dhe frika e tyre më e madhe është përsëritja e Gërdecit.
Theksojmë se i gjithë ky shqetësim ka ardhur pas shpërthimit i cili u shua nga ndërhyrja e zjarrëfikseve.
“Kjo është një fushë e minuar, ti vënë gishtin kokës, është kot edhe kryeministri i vendit, po të jetë puna unë jam i majtë. Në fillim na kanë ardhur dhe na janë prezantuar si biznese kozmetike, dhe më pas e kanë bërë depozitë gazi”, shprehet një prej banorëve.
Ndërkohë që një qytetar tjetër shprehet: Ky gaz këtu dëmton Durrësin, Krujën dhe Tiranën, sa herë jemi ankuar ne, po nuk na pyet njeri.
Banorët protestojnë me pankarta në duar, disa prej të cilave shkruajnë : “Po luani me jetët tona”, “Kur do jetë shpërthimi i rradhës? Sa i madh?.
Banorët u mblodhën pa ndasi partiake, të majtë dhe të djathtë, fëmijë dhe të moshuar në kërkim të së drejtës së tyre.
Nëse institucionet vazhdojnë të mos ndërmarrin asnjë masë për largimin e kompanisë, banorët kërcënojnë me bllokimin e rrugës.
