Ditën e sotme, për më shumë se 6 orë, kryedemokrati Lulzim Basha ka mbledhur në selinë blu 71 kryetarët e degëve të Partisë Demokratike. Teksa diskutonte lidhur me zhvillimet më të fundit dhe me përplasjet që ai ka pasur me liderin historik të PD, Sali Berisha. Gjatë fjalës së tij, Basha ka paralajmëruar me ndëshkime, për të gjithë ata do të shkelin vendimin e Kryesisë së PD-së.
“Por veprimet ilegjitime, tentativa për bunkerizim, dëmtimi i interesave elektorale dhe politike të PD, e kanë përgjigjen në statut. Dhe do ta zbatoj statutin ndaj kujtdo. Kush shkel vendimin e Kryesisë së partisë, fatin e ka të caktuar nga statuti i partisë, përfshirë këtu edhe Sali Berishën. Boll është boll. Asnjë anëtar nuk është mbi statutin dhe nuk është mbi të tjerët,”-mësohet se është shprehur Basha.
Por gazetarë të politikës, duke cituar burime të tyre brenda selisë blu, bëjnë me dije se gjatë fjalës së tij, Basha ka përmendur nenin 27 të statutit që paralajmëron ndëshkime, përfshirë edhe përjashtimin nga partia. Megjithatë ky version është hedhur poshtë nga sekretari i Përgjithshëm i PD, Gazment Bardhi, i cili pretendon të kundërtën, duke pretenduar se e gjitha ishte “fake news”. Ai shtoi se 18 dhjetori, datë e caktuar për Kuvendin e PD-së, është për bashkim, jo përçarje.
“Dua të jem transparent, me përjashtim të 5 kryetarëve, që raportuan një shqetësim, e gjitha pjesa tjetër konfirmuan frymën e bashkimit që përcjell ky Kuvend i 18 dhjetorit. Dua të ftoj çdo anëtar të PD-së që mos të shqetësohet nga lajmet e rreme dhe deklaratat dashakeqe se ky kuvend do të jetë kuvendi i përjashtimit të demokratëve që mendojnë ndryshe apo ata që do të marrim pjesë në mitingun e thirrur nga zoti Berisha në 11 dhjetor. 18 dhjetori nuk është për të përjashtuar demokratët, por për t’i bërë bashkë. Frymën e përçarjes për fat të keq gjatë këtyre dy muajve e ka përcjellë vetëm zoti Berisha dhe qëndrime te tij kundër rregullave të bashkëjetesës dhe që përbëjnë statusin e PD. Kam një apel për një koleg timin që flet për përjashtim të 500 apo 100 demokratëve që të qetësohet dhe të marrë frymë thellë. Mos t’i fryjë zjarrit të përçarjes,”-sqaroi Bardhi jashtë selisë blu.
Por cila është e vërteta? A ka paralajmëruar Basha me përjashtime nga Partia Demokratike?
