Dy muaj pasi pranoi ftesën e kryeministrit Edi Rama, deputeti britanik Nigel Farage njoftoi se do të drekonte me kreun e qeverisë shqiptare për të diskutuar mbi deportimin e kriminelëve të huaj, të cilët ai i cilëson si kërcënim për sigurinë kombëtare të Britanisë.
“Ne do të deportojmë kriminelë të huaj. Do të shkoj për drekë pas disa javësh me kryeministrin e Shqipërisë. Mund të rezervoj një avion shumë të madh dhe të marr një ngarkesë me vete, nuk jam i sigurt ende. Ne do ta ndalojmë atë që është një kërcënim për sigurinë tonë kombëtare, atë që është një rrezik për vajzat dhe gratë në rrugët tona. Ne do t’i ndalojmë anijet dhe do t’i ndalojmë e deportojmë ata që hyjnë ilegalisht në vendin tonë, duke bërë atë që bën pothuajse çdo vend normal në të gjithë botën”, u shpreh Farage në një takim me anëtarët e Reform UK.
Pas dorëheqjes së zëvendëskryeministres Angela Rayner, ai theksoi se vendi duhet të jetë i përgatitur për zgjedhje të parakohshme të përgjithshme.
“Nuk mund të vini ilegalisht dhe të qëndroni, ne do t’i ndalojmë anijet brenda dy javësh nga fitorja”, deklaroi Farage, duke shtuar se një qeveri e drejtuar nga partia e tij do të bllokonte çdo kalim ilegal me anije dhe do të deportonte menjëherë migrantët pa dokumente.
Kujtojmë se përplasja verbale mes Farage dhe Ramës nisi pas deklaratave të tij për numrin e lartë të shqiptarëve në burgjet britanike, të cilat kryeministri i Shqipërisë i ka quajtur të pavërteta dhe fyese.
