Ornaldo Rakipi, djali i Aqif Rakipit, ka thyer herësin dhe ka fituar mandatin e deputeti të Partisë Socialiste.
Rakipi ka fituar deri në këto momente 12 627 vota, kur deri në këto momente janë numëruar 5197 qendra votimi.
Djali i ish-deputetit të Partisë Drejtësi Integrim dhe Unitet merr një mandate të rëndësishëm, pasi ka ‘rrëmbyer’ karrigen e Ervin Bushatit, kryetarit të Partisë Socialiste të Tiranës.
Për të thyer herësin e partisë dhe për të fituar mandatin, Ornaldo Rakipit i duheshin 12 603 vota, ndërkohë që kur ka mbetur edhe 2 kuti në Tiranë ai e ka kaluar këtë pritshmëri.
Ervin Bushati, deputeti i dy legjislaturave ishte renditur në listën e Partisë Socialiste në vendin e tretë, dhe ai ka marrë si vota preferenciale 1 867 vota.
Ndërkohë që Ornaldo Rakipi ishte numri 30 në listën e PS-së dhe ka siguruar mbështetjen më të lartë mes socialistëve, duke u renditur si deputeti i tretë më i votuar në PS.
Po kush është Rakipi? I riu është djali i ish-deputetit të Partisë Drejtësi Integrim dhe Unitet, Aqif Rakipi. Ky i fundit e humbi përfundimisht të drejtën të hynte në Kuvend më 21 shkurt 2019, kur Gjykata Administrative i rrëzoi padinë për t’u rikthyer në Kuvend.
Rakipit iu hoq mandati në vitin 2018 bashkë me Gledion Rehovicën pas verifikimit se në Itali ishte arrestuar në vitin 1998 për vjedhje. Këtë arrestim ai e kishte fshehur në formularin për dekriminalizimin dhe KQZ i hoqi mandatin pas verifikimit të shkresës që erdhi nga pala italiane përmes Interpolit. Në vendin e tij, Rama i la një vend të birit, vetëm 27 vjeç dhe pa eksperienca të mëparshme politike. Madje kreu i qeverisë, teksa prezantonte listën, premtoi surpriza për komunitetin çam, duke përmendur emrin e Tahir Muhedinit, ish-deputet i PDIU. Megjithatë edhe pse pa ‘reklamën’ e kryeministrit, 27-vjeçari do të hyjë në Kuvendin e ri.
