Ndotja e mjedisit është kthyer në një problem shqetësues në të gjithë vendin dhe ndonëse mediat raportojnë çdo ditë raste kompromentuese qeveria dhe autoritetet përkatëse vijojnë të bëjnë rolin e të verbërit.
Ditën e sotme banorët e fshatit Gëshenjas në Pogradec janë ngritur në protestë, pasi janë kundër ndërtimit të një pike grumbullimi plehrash në fshatin e tyre. Ata shprehen se nuk do të lejojnë ndërtimin e kësaj pike grumbullimi, e cila do të jetë në funksion të landfillit të Maliqit. Banorët theksojnë se nga plehrat do iu shfaqen sëmundje dhe u janë prerë edhe pemët frutore.
“Gështenjët na i prenë, ikën ato. Tani sjellin plehrat këtu. E ka shitur ai zotëria, ka marrë 500 milionë dhe i ndërron makinat.”, tha një banor për Report Tv.
Ndërsa një tjetër u shpreh: “ Por erdhën plehrat këtu, nuk hahen gështenjat më. Do vdesim të tërë, do bëhemi me kancer. Këta i paguan shteti e janë të detyruar. Nuk jemi as gjermanë, as italianë, as serbë që ka sjellë të gjithë policinë këtu. Nuk jemi kundër familjeve tona se ata janë të gjithë djemtë e mi dhe të këtij këtu.”
Ata theksuan më tej se plehrat do iu dëmtojnë ujin, tokën, prodhimet bujqësore dhe pemët frutore. Këto të fundit janë burimet e vetme me të cilat sigurojnë ushqimin.
