Ish-kryeministri Sali Berisha ka folur këtë të premte në lidhje me akuzat ndaj Fredi Belerit. Në një dalje për mediat, Berisha tha se Fredi Beleri bën mirë kur thotë se është grek, pasi sipas tij ai është grek.
Gazetarët i sollën në kujtesë Berishës masakrën e Peshkëpisë, për të cilën Beleri ka qenë i akuzuar, si dhe djegjen e flamurit shqiptar nga ky i fundit. Berisha tha se djegien e flamurit nuk e ka parasysh si moment, ndërsa në lidhje me akuzat për masakrën e Peshkëpisë, tha se gjykata i ka rrëzuar këto të fundit.
“Nuk kam parasysh se ka djeg flamurin, por vijmë te thelbi… që Fredi Beleri thotë jam grek, bën mirë se është grek. Ne jemi vend i lirë dhe çdo njeri duhet të ketë të drejtën të tregojë identitetin e tij kombëtar.
Një nga momentet që më ka mbetur në mendje ishte një debat në parlament mes Vangjel Dules dhe Edi Ramës. U përplasën për një problem, Edi Rama iu vërsul me një urrejtje të papërmbajtur si grek. Unë i thashë ky duhet të jetë krenar me origjinën e tij, s’mund ta fyesh. Pse ja bëri? E kishte patur kushedi sa herë në koalicion dhe pse ta fyente.
Vangjel Dule është grek krenar. Çfarë t’i them unë mos ji krenar?! Montimi i turpshëm i Edi Ramës ndaj Belerit ishte gjëja më e turpshme”, tha Berisha.
