Monika Kryemadhi, deputetja e Partisë së Lirisë, ka firmosur publikisht një shtesë kallëzimi ndaj SPAK-ut lidhur me çështjen e inceneratorit të Tiranës. Sipas saj, Bashkia e Tiranës ka lejuar një ndërtim pa leje në një sipërfaqe prej 15 hektarësh, duke kërkuar një hetim të thelluar për këtë çështje. Kryemadhi ka shpallur se pjesa e territorit ku është ndërtuar inceneratori është e përfshirë në hartën e depozitimeve jashtë territorit të landfill-it, duke hedhur dyshime se pagesat për depozitat e jashtëzakonshme kanë shërbyer për të mbuluar një sipërfaqe prej 15 hektarësh tokë. Por ndonëse nuk do mend që kryebashkiaku i Tiranës është i përfshirë tek inceneratorët, Kryemadhi në denoncimin e saj nuk u mor me persona të tjerë të nivelit të Veliajt, përgjegjës për atë që është cilësuar si afera e shekullit, si për shembull ish-ministri i mjedisit Blendi Klosi. Pse nuk u përmendën këto emra vallë? Një gjë është e sigurt që humbja e besueshmërisë në opozitë vjen kryesisht nga këto dallime preferenciale që iu bëhen aktorëve të përfshirë në një aferë apo skandal.
Ndërkohë politika nuk është e vetmja që po i bën këto dallime preferenciale për këta individë, të cilët paskan ‘miq të fortë’ edhe në media.
Në një debat televiziv, gazetari Ylli Rakipi ka shprehur qëndrimin e tij kritik ndaj kryebashkiakut Erion Veliaj, duke e vlerësuar se ai duhet të tërhiqet nga detyra pas arrestimeve të drejtorëve të Bashkisë në lidhje me inceneratorin. Sekretari i Përgjithshëm i PS-së, Blendi Klosi, ka përpjekur të justifikojë situatën duke thënë se ministri nuk ka dijeni për veprimet e drejtorëve të tij.
Gazetari Ylli Rakipi ka insistuar në pyetjen se si mund të hetohen drejtorët për veprime të njohura dhe të kryebashkiaku të mos dijë asgjë. Klosi ka shtuar se drejtësia duhet të bëjë vlerësimin e veprimeve të tyre.
Debati ka shtruar dilema rreth përgjegjësisë morale dhe politike të kryebashkiakut Erion Veliaj, me Rakipi që ka kërkuar tërheqjen e tij, ndërsa Klosi ka insistuar në pritjen e vendimeve nga drejtësia.
Pra gazetari sulmon Veliajn për inceneratorin, ndërkohë që Blendi Klosi i bën ‘avokatin’ duke qenë vetë i zhytur deri në fyt me atë aferë. Kjo është hipokrizia që transmetohet si gazetari cilësore në Tv shqiptare, ku interesat i ndajnë ‘aktorët’ në të nënës dhe të njerkës në varësi të interesave. Kujtojmë se në 1308 faqe dokumente shkresore, mesazhe telefonike dhe e-maile, ish-Ministri i Mjedisit, Blendi Klosi, del 27 herë si kontaktues konfidencial privat e zyrtar me Klodian Zoton e Mirel Mërtirin dhe firmosës i 15 dokumenteve për landfillin e Tiranës.
