Një nga lajmët që ka bërë bujë ditën e djeshme ka qenë edhe propozimi i ardhur nga Bashkia e Dibrës për të bërë kryeministrin Edi Rama qytetar nderi, i cili mesa duket nuk do të mbetet vetëm aq.
Ka qenë këshilltari i pavarur i Bashkisë Dibër, Astrit Ademi ai që ka propozuar emrin e Ramës, mirëpo e njëhershme ka qenë edhe përgjigjja e ardhur nga kryeministria, duke mos e pranuar këtë propozim.
Por Ademi nuk do të ndalet dhe këtë e ka vërtetuar ditën e sotme.
Këshilltari i pavarur, ka vendosur që në shenjë mirënjohjeje kur të përfundojë rrugën e Arbrtit, ai do të bëjë një bust për Edi Ramën me paratë e tij.
Këtë ka për ta bërë vetëm sepse kjo rrugë është shumë e rëndësime për banorët e zonës dhe kjo sipas tij është një shenjë vlerësimi.
“E para është se kjo rrugë ka 28 vite që gënjejnë udhëheqësit dhe më në fund Rama e premtoi edhe unë i kam thënë shprehimisht që: Do ta na gënjesh edhe ti si gjë të tjerët. Faktikisht ai nuk ka gënjeu. As kam bërë bisedë me stafin e kryeministrit, as më stafin e Bashkisë. Ajo ishte një ide personale e imja si këshilltar i pavarur. Është një mirënjohje e popullit të Dibrës për atë rrugë që ne e kemi pasur ëndërr. Unë do të thosha edhe një gjë tjetër për këtë, që ditën kur ta mbarojë do t’i bëjë një bust Ramës, jo kryeministrit por Edi Ramës. Ku të jetë më i përshtatshëm do t’i bëj një bust me paratë e mira. Sepse është një tmerr të nisesh për Tiranë është tmerr për çdo dibran.”, u shpreh Astrit Ademi në Bashkinë Dibër.
