Prej shtatë ditësh, disa fshatra të bashkisë Finiq po përballen me vatra aktive zjarri, të cilat kanë shkaktuar dëme të konsiderueshme materiale dhe kanë vënë në rrezik jetën e banorëve. Edhe pse mbrëmjen e së dielës situata u duk se po vihej nën kontroll, flakët janë përhapur sërish me intensitet, duke përfshirë fshatin Leshnica e Poshtme dhe duke u shtrirë në drejtim të Leshnicës së Sipërme.
Era e fortë ka përkeqësuar ndjeshëm situatën, duke favorizuar përhapjen e zjarrit dhe duke vështirësuar ndërhyrjen nga toka. Në Leshnicën e Poshtme, mbrëmë janë raportuar disa banesa të djegura, ndërsa për sigurinë e banorëve është ndërmarrë evakuimi i menjëhershëm.
Që në orët e para të mëngjesit, një helikopter është përfshirë në operacionet për shuarjen nga ajri, ndërkohë që forcat zjarrfikëse janë të angazhuara në terren, duke luftuar me flakët në disa fronte.
Paralelisht, ekipet zjarrfikëse po përqendrojnë përpjekjet edhe në fshatin Krongj, ku janë aktive dy vatra më të vogla. Për të përforcuar operacionin, pritet të mbërrijnë nga Greqia dy helikopterë të tipit “Canadair”, të specializuar për ndërhyrje në terrene të vështira dhe malore.
Autoritetet lokale dhe strukturat e emergjencave vijojnë të apelojnë për vigjilencë dhe bashkëpunim nga komuniteti, ndërsa situata mbetet e tensionuar dhe nën monitorim të vazhdueshëm.
