Oerd Bylykbashi, nënkryetar i Partisë Demokratike dhe bashkryetar i komisionit për reformën zgjedhore, ka theksuar rëndësinë e votës së emigrantëve në një tryezë me partitë, ku është diskutuar mbi reformën zgjedhore. Sipas Bylykbashit, vota e emigrantëve përbën një basen të madh të votave të lira që nuk mund të kapen dhe që mund të ndikojnë në rotacionin e pushtetit.
“Vota e emigrantëve është baseni më i madh i votave të lira, vota që nuk i kap dot,” u shpreh Bylykbashi. Ai shtoi se mbi 2.2 milion shqiptarë jetojnë jashtë, por vetëm 18 mijë prej tyre janë të regjistruar për të votuar, një numër që përbën më pak se 1% të popullsisë në diasporë.
Bylykbashi kritikoi qeverinë për mungesën e vullnetit për të zbatuar vendimin e Gjykatës Kushtetuese lidhur me votën e emigrantëve. “Socialistët nuk kanë vullnet për të zbatuar vendimin e Gjykatës Kushtetuese, lidhur me votën e emigrantëve, për të cilat tha se janë një basen që jo vetëm nuk mund të kapen, por mund të ndikojnë në rotacionin e pushtetit.”
Gjithashtu, ai theksoi nevojën për ndryshime në Kodin Penal për të përfshirë penalitete ndaj manipulimeve zgjedhore, një kërkesë që sipas tij është refuzuar nga socialistët për shkak të sistemit të patronazhimit. “Kemi kërkuar që të përfshihen penalitete në Kodin Penal, por nuk pranohet nga socialistët, pasi është sistemi i patronazhimit,” tha ai.
Në lidhje me koalicionet zgjedhore, Bylykbashi vuri në dukje se nëse ato do të lejoheshin, Partia Socialiste do të kishte vetëm 69 mandate dhe nuk do të kishte mundësi të formonte qeverinë, ndërkohë që në zgjedhjet e vitit 2021 përfitoi 5 mandate shtesë, duke shkuar në 74. “Nëse do të kishim koalicionet, do të kishim një Parti Socialiste me 69 mandate, pa pasur mundësi që të kishte mandatet e nevojshme për të formuar qeverinë,” tha Bylykbashi.
