Gazetari i portalit “Pamfleti”, Gjergj Zefi është dhunuar me sende të forta nga një grup personash. Lajmi është bërë i ditur nga uniformat blu në një njoftim zyrtar, teksa tregojnë se Zefi aktualisht ndodhet në spital dhe po merr ndihmë mjekësore. Ngjarja ka ndodhur në rrugën “Bardhok Biba” në Tiranë.
“Më datë 03.10.2023, nga një telefonatë në Sallën Operative është marrë njoftim se në rrugën “Bardhok Biba”, persona të paidentifikuar kanë goditur me sende të forta një shtetas. Pas verifikimeve të kryera ka rezultuar se personi i dëmtuar është shtetasi Gj. Z., 52 vjeç (administrator i një portali), i cili aktualisht po merr ndihmën mjekësore. Me marrjen e njoftimit, është ngritur grupi Hetimor dhe nën drejtimin e Prokurorisë vijon puna për sqarimin e rrethanave të ngjarjes, identifikimin dhe kapjen e autorëve”, thuhet në njoftimin e Policisë e Shtetit.
Sjellim në vëmendje se portali “Pamfleti” konsiderohet si një portal ‘gjobvënës;, teksa e shfaq këtë në një formë të gazetarisë denoncuese. Në fakt duhet theksuar se fenomeni i gjobëvënies në media është përhapur shumë, ku gazetaria zhytet në llumin e korrupsionit, duke kërkuar shuma të majme në këmbim të fshirjes, editimit, apo publikimit të lajmeve të caktuara. Më herët Këshilli i Media, nisur nga rasti i gazetarit Adriatik Doçi, e dënoi rëndë fenomenin e gjobëvënies në gazetarinë shqiptare .
“Reklama në shkëmbim të heshtjes apo mossulmit, tarifa mujore të marra nga biznese në shkëmbim të mos- raportimit të problemeve të produkteve tregtare të cilat dëmtojnë jetën e konsumatorëve, janë vetëm një pjesë në arsenalin që personi në audio-përgjim pranon se disponon dhe përdor, në mënyrë jo etike, por edhe të paligjshme”, thuhej në deklaratën zyrtare të Këshillit të Medias.
