Një ngjarje e rëndë ka ndodhur mbrëmjen e së shtunës në një hotel në zonën e Skelës në Vlorë, ku një kamerier i ri është dhunuar brutalisht në sy të klientëve, nga dy burra, njëri prej të cilëve është Ardian Isufi, ish-shef i Qarkullimit Rrugor të Vlorës, ndërsa tjetri i identifikuar si Leart Bino, një person me precedentë kriminalë.
Sipas pamjeve të bëra publike, konflikti nisi për një shishe ujë të tepërt në porosi. Dy burrat u ngritën nga tavolina dhe shkuan drejt banakut ku ndodhej kamerieri, duke i kërkuar llogari. Ish-efektivi Ardian Isufi u pa duke e prekur dhe më pas duke ndërhyrë fizikisht ndaj të riut. Pas tij, ndërhyri dhe Leart Bino, i cili e goditi kamerierin disa herë në fytyrë dhe qafë.
Kamerieri, vetëm 18 vjeç, rrëfeu se ishte duke kryer detyrën dhe nuk kishte bërë asgjë për ta provokuar situatën. “Erdhën dy zotërinj, porosia ishte një shishe ujë e madhe, një e vogël dhe një makiato. Më thanë të heq ujin. U thashë ok, vetëm mos ofendoni. Më ndoqën deri në banak, më goditën me shpullë dhe dy herë me grusht. Më hodhën edhe syzet, mirë që nuk mi thyen,” tha i riu.
Dhuna ndodhi në mes të lokalit, para syve të klientëve vendas dhe të huaj, të cilët, sipas dëshmitarëve, u larguan të tronditur nga skena. Kamerieri, për të shmangur pasoja më të rënda, u detyrua të largohej nga ambienti.
Ngjarja ka shkaktuar indinjatë të gjerë për shkak të përfshirjes së një ish-zyrtari të lartë policie dhe mungesës së çdo përmbajtjeje përballë një punonjësi të ri që thjesht po kryente detyrën. Autoritetet ende nuk kanë dhënë një reagim zyrtar për incidentin.
