Duke marrë shkas nga ngjarja e djeshme në godinën e Qytet Studentit, pedagogë, prindër dhe studentë, kanë dalë në protestë përpara Fakultetit të Ekonomikut.
Ata bëjnë thirrje për zbardhjen e ngjarjes së rëndë dhe vënien para drejtësisë të autorëve.
Pedagogu Rezart Prifti tha se siguria në institucione është zero dhe jemi në pikë ‘më jep notën se të çaj gojën’.
Më tej ai shtoi se personat e panjohur që u futën në mes të leksionit, nuk e kanë nisur fare fakultetin.
“Ne jemi njerëz të penës, jo të pistoletës. Jemi pak a shumë në situatën ‘më jep notën, se të çaj gojën’. Kjo është një çështje e shtetit, jo thjesht e institucioneve. Siguria në institucione është zero. Studentët kanë qenë viti i tretë Bachelor, ndërsa ata horrat kanë qenë moshë më të madhe. Ata nuk e kanë nisur fare fakultetin. Kjo është një situatë banale. Organizimi i sotëm ishte spontan dhe unë mendoj se duhet të vazhdojë, derisa të dalin horrat, sepse gjashtë vajza rrinë aty, pasi kanë frikë të dalin. Vajzat fatmirësisht nuk kanë rënë pre e dhunës”, tha pedagogu Prifti.
Pasditen e djeshme dy persona të panjohur u futën në godinën pranë ish-mensës në Qytet Studenti, ku po zhvillohej një orë leksioni me student të ekonomikut.
Dy persona të panjohur, duke thënë se i kishte dërguar dekani, u futën në leksion dhe filluat të ngacmonin vajzat.
Djemtë e klasës kanë reaguar duke i përzënë jashtë, ndërsa pedagogia ka ndërprerë leksionin.
Mirëpo jashtë godinës, të panjohurit kishin thirrur shokët e tyre, të cilët më pas dhunuan fizikisht djemtë, duke i shkaktuar disa fraktura.
