Kryeministri Rama e quan kufirin detar punë të mbaruar,me të cilën do të merret Gjykata Ndërkombëtare e Detit. Në konferencën e përbashkët me ministrin e jashtëm Dendias, ai ka njoftuar se Greqia e Shqipëria do t’i drejtohen gjykatave ndërkombëtare për detin! Ai ka bërë me dije se së shpejti do të ketë mbledhje të përbashkët mes dy qeverive.
“Më vjen keq për patriotët e detit, por duhet të gjejnë arsye të tjera për të shpallur patriotizmin se kjo e detit nuk është më çështje që të bëjnë propagandën e shtirur anti greke dhe as elektorat patriotik.
Të vetëvendosën në çështje të tjera. Kjo çështje tani do jetë në dorë të drejtësisë ndërkombëtare. Kështu fokusohemi tek bashkëpunimi ekonomik, rajonal dhe për një mbledhje të parë të dy qeverive tona për tu marrë me çështje që kanë rendësi për njerëzit e zakonshëm, shqiptarët në Greqi dhe grekët këtu”,- ironizoi Rama.
“Greqia mike ndihmoi për tërmetin”
“Kemi hapur një kapitull shumë pozitiv me qeverinë e Greqisë. Dua ta risjellë faktin se përveç ministrit që ka qenë këtu personalisht, kryeministri ka qenë ndër të parët që është interesuar pas tragjedisë dhe ka qenë në vijimësi i dëshiruar për t’u informuar qoftë për kërkim shpëtimin dhe rindërtimin dhe i gatshëm së bashku me qeverinë edhe në atë moment vështirësie që u krijua në kufi si rezultat i masave të marra”, deklaroi Rama.
Minoriteti grek
Kryeministri Edi Rama ka sqaruar se çështja e minoriteteve ka qenë në fokus të këtij takimi me ministrin grek, Nikos Dendias, ku tha se nuk ka pasur asnjë hezitim nga ana e Greqisë për të bërë maksimumin për të drejtat e shqiptarëve në Greqi dhe e anasjella. Edhe pensionet kanë qenë një temë tjetër e diskutimit. Ndërsa për çamët, për ligjin e luftës, Kryeministri nuk përmendi asnjë fjalë.
“Nuk i përket Greqisë çështja e të drejtave të minoritetit grek në Shqipëri, nëse duam për monoritetin grek dhe të gjitha të tjerat standardet më të mira këtë nuk e bëjmë se e kërkon Greqia, por sepse është në nderin dhe vizionin tonë për shtëpinë tonë të përbashkët, Shqipërinë. Kjo vlen dhe për Shqiptarët që jetojnë në Greqi dhe besojmë se sic është në interesin tonë, që të kenë kushtet më të mira, ashtu është dhe në të mirën e tyre. Nuk kemi pasur asnjë hezitim kur vjen puna për të bërë maksimumin për minoritete. Kemi diskutuar për çuar më tej axhendën në këtë drejtim, për legjislacionin që duhet plotësuar dhe për të gjithë elementët e tjerë që kanë të bëjnë me jetën e njerëzve me një gjuhë anëtarë tjetër, me një kulturë dhe një domosdoshmëri për ta ruajtur gjuhën e tyre”, tha Rama.
Patentat dhe pensionet
Rama foli me mikun grek edhe për njohjen e patentave dhe të pensioneve.
“Falë vullnetit të mirë të kryeministrit grek dhe qeverisë, u bë njohja në parlament e patentave. Diskutimi për pensionet është një diskutim që është i hapur, por qoftë me Greqinë dhe Italinë ku është prania më e madhe e emigrantëve, s’është diskutim i lehtë, për këtë arsye procesi i diskutimit vazhdon me shprehjen e vullnetit të mirë për ta zgjidhur këtë proces”, deklaroi Rama.
/GazetaReforma.com/
