Një operacion i SPAK goditi një rrjet të përpunimit të kokainës, ku 10 persona u arrestuan, përfshirë katër shqiptarë që organizonin trafikun.
Kokaina vinte nga Amerika Latine e fshehur në lëkurën e gjedhit për të shmangur kontrollet.
Burime bëjnë me dije se katërshja Geis Fejsullai, Klajd Birçe, Aldi Zonja dhe Artion Çaushllari, ishin financuesit dhe personat që organizonin të gjithë skemën e trafikut të drogës.
Grupi kishte laboratorë në Fushë-Krujë dhe shpërndante drogën në Durrës dhe Tiranë në dy pika, të rezidenca e VIP-ave Kodra e Diellit 2, si dhe në bazën pranë Portit të Durrësit.
Mësohet gjithashtu se baza në rezidencën e VIP-ave ishte marrë me qira nga një prej anëtarëve të grupit.
Ky është një ndër të pakta operacione të udhëhequra nga SPAK, përmes të cilit janë ekzkeutuar të gjitha urdhërarrestet e lëshuara nga GJKKO, duke lënë zero hapësira për dekonspirim. 10 urdhër arrestet u ekzekutuan në operacionin e 15 tetorit duke çuar në pranga 7 shqiptarë dhe 3 të huaj, 2 venezuelian dhe 1 kolumbian.
Të arrestuarit janë: Geis Fejsullai 42 vjeç, banues në Tiranë; Klajd Birçe 40 vjeç, banues në Tiranë; Aldi Zonja 37 vjeç, banues në Tiranë; Artion Çaushllari, 37 vjeç, banues në Tiranë; Endi Sejdini, 25 vjeç, banues në Krujë; Ismail Abdurrahmani, 51 vjeç, banues në Shkodër; Baki Huqi, 57 vjeç, banues në Durrës.
Ndërsa në pranga kanë rënë edhe Hiwlen Ledezma Narvaez, 41 vjeç, shtetas kolumbian; Joze Ramon Zacarias Vasquez, 35 vjeç, shtetas venezuelian dhe Samuel Alfonso Moreno Serrano, 42 vjeç, shtetas venezuelian.
Në operacion u sekuestruan 6.1 kg kokainë, 36,270 euro, pajisje për përpunimin e drogës dhe 48 lëkura bagëtish. 22 telefona celularë, 2 laptopë, 7 karta banke dhe 17 karta SIM; 3 automjete të markave të ndryshme dhe dokumente të tjera të rëndësishme.
