Detaje të reja janë zbuluar nga ekzekutimi i bujshëm i Bujar (Hasan) Lika dhe Paulin Gjergji (Marku), dy ditë më parë në qytetin e Laçit.
Autorët kanë ndjekur hap pas hapi, Likën dhe në momentin kur ai ka ndaluar në hotelin “A&A” për të takuar Gjergjin, e kanë ndjekur nga pas, shkruan Dosja.al.
Ata kanë shkuar në vendin e krimit me një makinë ‘Golf 5’ dhe pasi janë ndalur në hotel, njëri është shkëputur nga grupi për të neutralizuar dy djemtë e Gjergjit, që u ndodhën në vendngjarje, duke u thënë: Mos lëvizni, se jemi policia!
Këta të fundit pasi kanë parë masakrën e ndodhur brenda hotelit, nuk kanë mundur që të bëjnë asgjë veçse të luten për jetën e tyre.
“Aman mos na vrisni edhe ne,”-mësohet se janë shprehur dy djemtë.
Sipas asaj që ka dëshmuar banakeri fillimisht autorët kanë qëlluar në drejtim të Likës, të cilin e thirrën në emër, nxorrën armët dhe e vranë në vend.
Ky i fundit pasi pa autorët, nxorri armën dhe qëlloi, duke plagosur 21-vjeçarin, Kreshnik Tusha.
Teksa iknin autorët plagosën Markajn, i cili ndërroi jetë disa orë më pas në spitalin e Traumës.
Sapo kanë kryer masakrën brenda hotelit, autorët janë larguar me shpejtësi duke marrë me vete edhe Tushën, të cilin e kanë dorëzuar në shtëpi, duke detyruar familjarët që ta dërgonin në spital.
