Përpjekja e njëmbëdhjetë për konstituimin e Kuvendit të Kosovës ka dështuar sërish, si pasojë e mungesës së pajtimit ndërmjet partive parlamentare për mënyrën e zgjedhjes së kryetarit të Kuvendit.
Seanca, e cila u drejtua nga kryesuesi Avni Dehari, u zhvillua në prani të 111 deputetëve, por pa përparim në drejtim të plotësimit të rendit të ditës.
Edhe kësaj here, Dehari u bëri thirrje partive opozitare, PDK, LDK, AAK, Nisma dhe Lista Serbe që të propozojnë anëtarë për komisionin ad-hoc që do të mundësonte organizimin e votimit për zgjedhjen e kryeparlamentarit.
Megjithatë, këto parti refuzuan sërish, duke kundërshtuar procedurën e votimit të fshehtë të propozuar nga Lëvizja Vetëvendosje.
Ngërçi vazhdon rreth kandidaturës së Albulena Haxhiut, të cilën LVV po e mbron me ngulm si zgjedhje të merituar, ndërkohë që partitë opozitare e shohin si një figurë polarizuese.
PDK dhe AAK kanë kërkuar që LVV të propozojë një emër tjetër, dhe AAK ka përmendur edhe dy alternativa të pranueshme brenda LVV-së Saranda Bogujevci dhe Shqipe Selimi.
LDK, nga ana tjetër, ka deklaruar qartë se nuk do të mbështesë asnjë kandidat të propozuar nga Vetëvendosje.
Në përpjekje për të dalë nga situata, LVV ka propozuar një paketë që përfshin votimin e kryetarit të Kuvendit dhe tre nënkryetarëve nga radhët e partive shqiptare, përveç dy vendeve që u takojnë komuniteteve joshumicë. Megjithatë, kjo ofertë nuk ka rezultuar e mjaftueshme për të arritur një konsensus.
Situata po monitorohet me vëmendje nga faktori ndërkombëtar. Bashkimi Evropian dhe përfaqësues diplomatikë në Kosovë, përfshirë ambasadorin gjerman Jorn Rohde, kanë shprehur shqetësimin e tyre për zvarritjen e krijimit të institucioneve të reja dhe u kanë bërë thirrje forcave politike që të veprojnë me përgjegjësi dhe të vendosin interesin e shtetit mbi atë partiak.
Seanca pritet të vazhdojë më 7 maj në orën 10:00. Në rast se Kuvendi nuk konstituohet dhe nuk arrihet të formohet qeveria brenda afateve kushtetuese, presidentja Vjosa Osmani ka të drejtë të japë mandatin një partie tjetër që siguron shumicën. Nëse dështon edhe ky opsion, vendi përballet me mundësinë e mbajtjes së zgjedhjeve të reja./ REL
