Seanca paraprake për dosjen “SASPAC” u shty, pasi avokatët e të pandehurve kërkuan kohë shtesë për t’u njohur me prova që, sipas tyre, nuk ishin bërë pjesë e hetimeve gjatë fazës paraprake.
Ata pretenduan se këto materiale janë thelbësore për përgatitjen e një mbrojtjeje të plotë dhe efektive në gjykim.
Ndër kërkesat e parashtruara ishte edhe dorëzimi i akteve të ekspertimit që lidhen me analizën e të dhënave të zbërthyera nga telefonat, USB-të dhe pajisje të tjera elektronike të sekuestruara gjatë hetimit. Gjykata caktoi datën 6 maj, ora 10:00, për vijimin e seancës.
Dosja “SASPAC” përfshin akuza ndaj ish-drejtorit të Agjencisë për Programimin e Ndihmës së Huaj, Ilir Beqaj, dhe tetë të pandehurve të tjerë, si dhe dy shoqërive tregtare, për një sërë veprash penale të lidhura me abuzime në menaxhimin e fondeve.
Të pandehur në këtë çështje janë:
• Ilir Beqaj
• Ermal Kurtulaj
• Gazmend Haxhia
• Alfred Nikolla
• Elton Marini
• Bjona Ziaj
• Bledar Leka
• Marinela Jazoj
• Mira Topçiu
• Shoqëria tregtare “Landëways International” sh.p.k
• Shoqëria tregtare “Nine Service Int” sh.p.k
Ilir Beqaj, ish-ministër i Shëndetësisë dhe ish-drejtues i programit të fondeve IPA, përballet me pesë akuza, përfshirë korrupsionin pasiv, shkelje të barazisë në tendera, falsifikim dokumentesh, mashtrim dhe mosdeklarim pasurie.
Hetimet për këtë dosje u mbyllën nga SPAK në fillim të prillit.
