Mbrëmjen e djeshme në vendin tonë erdhën 8190 doza vaksinash anti-COVID të prodhuara nga kompania Pfizer. Siç ka ndodhur edhe me dozat e para, kryeministri Rama nuk mund të mungonte në pritjen që iu bë në aeroportin “Nënë Tereza”. Deri tani në vendin tonë kanë ardhur në total 17 355 doza të vaksinës Pfizer që mjaftojnë për të vaksinuar 8677 persona duke qenë se vaksina duhet të merret në dy doza për të siguruar mbrojtje më të mirë. Edhe pse vazhdimisht Rama thotë se jemi në pranë të marrëveshjes me shumë shtete të cilat do na sigurojnë sasi të mëdha dozash, ai asnjëherë nuk bën publike emra. Ndërkohë, në përditësimin e fundit nga Reuters thuhet se Shqipëria javën e fundit ka administruar mesatarisht 147 doza vaksinash në ditë, që do të thotë se duhen 3891 ditë që të vaksinohet vetëm 10% e popullsisë. Sasia e dozave që erdhi ditën e djeshme është e mjaftueshme për vaksinimin e vetëm 4095 persona që të marrin dy dozat e nevojshme. Ndërkohë, Rama lajmëroi ditën e sotme se do të nis procesi i vaksinimit masiv të popullsisë pa thënë një numër të saktë të vaksinave që pritet të vijnë, pa bërë publike kontrata dhe pa një skemë të mirëfilltë vaksinimi.
Ndërkohë, muajin e kaluar vendi ynë refuzoi vaksina që ambasada ruse ia ofroi vendit tonë falas. Kjo gjë u cilësua si provokim në një kohë që pandemia në vendin tonë ishte duke hyrë në një fazë kritike. Veç këtyre, kryeministri Rama po merr edhe një rol të mbizakonshëm duke e përcaktuar se kush do e marrë vaksinën e kush jo. Përzgjedhja që iu bë personaliteteve të moshuara për t’u vaksinuar ishte më shumë një përpjekie për të fshehur faktin se procesi i vaksinimit është në vend numëro.
Rama e ka pranuar se as nuk ka në dispozicion dhe as nuk po i refuzon vaksinat ruse dhe kineze, ndërsa nuk ka bërë publike asnjë nga kontratat me Pfizer. Ndërkohë që kryeministri ka luksin të refuzojë vaksina e të bëjë marrëveshje, shumë njerëz në Shqipëri humbasin jetën në përballje me koronavirusin në mungesë të një vaksine që mund t’i mbrojë.
