Deputetët e Kuvendit të Kosovës u mblodhën sërish këtë mëngjes për të tentuar konstituimin e institucionit, pas disa përpjekjeve të dështuara, por edhe kësaj here mungoi dakordësia. Vazhdimi i shtatë i seancës konstituive nisi në orën 10:00.
Gati tre muaj pas mbajtjes së zgjedhjeve parlamentare më 9 shkurt, procesi i konstituimit vazhdon të mbetet i bllokuar për shkak të mospajtimeve mes disa prej partive kryesore rreth zgjedhjes së kryetarit të Kuvendit.
Përpjekja për konstituimin e Kuvendit, e nisur më 15 prill, ka dështuar gjashtë herë, kryesisht sepse partia fituese, Lëvizja Vetëvendosje, nuk ka arritur të sigurojë numrin e nevojshëm të votave për kandidaten e saj për kryetare, Albulena Haxhiu.
Vetëvendosje zotëron 48 nga 120 ulëset e Kuvendit. Në katër raundet e votimit, Haxhiu ka arritur të marrë deri në 57 vota, ndërsa për zgjedhje nevojiten të paktën 61 vota.
Figura e Albulena Haxhiut shihet si përçarëse nga Partia Demokratike e Kosovës (PDK) dhe Aleanca për Ardhmërinë e Kosovës (AAK), ndërsa Lidhja Demokratike e Kosovës (LDK) ka refuzuar të mbështesë çdo kandidat të propozuar nga partia fituese.
Lëvizja Vetëvendosje vazhdon të këmbëngulë se Haxhiu është kandidate e denjë për postin dhe, ndonëse ka bërë thirrje për arritjen e një marrëveshjeje politike, ka përjashtuar mundësinë e propozimit të një kandidati tjetër.
Sipas Kushtetutës së Kosovës, partisë fituese i njihet e drejta për të propozuar kandidatin për kryetar të Kuvendit.
Drejtori i Grupit Ballkanik për Politika në Prishtinë, Naim Rashiti, deklaroi për Radion Evropa e Lirë se moskonstituimi i Kuvendit ka nxjerrë në pah jo vetëm mungesën e konsensusit politik, por edhe mungesën e vullnetit për të respektuar përgjegjësitë institucionale që burojnë nga rezultati i zgjedhjeve.
Ai paralajmëroi se ky ngërç institucional po zgjatet “në mënyrë të rrezikshme, duke thelluar krizën politike dhe duke e futur vendin në një rrugë të pasigurisë kushtetuese”.
