Ruben Saraiva, i ekstraduar nga Maroku në fund të vitit 2023, i akuzuar për vrasjen e biznesmenit Ardian Nikulaj në Shëngjin më 19 prill 2023, ka mohuar akuzat ndaj tij.
Është siguruar procesverbali i marrjes në pyetje nga prokurorët e Lezhës në fund të vitit të kaluar. Ky është i vetmi rast, pas më shumë se një viti nga ekstradimi, që ai është përballur me organin e akuzës.
Ruben Saraiva ka deklaruar se ka lindur në Portugali dhe jetonte në Londër, ku punonte si trajner futbolli. Ai ka pranuar se ka pasur një dënim në Angli në vitin 2013 për shpërndarje droge, por ka refuzuar të zbulojë qytetin e lindjes në Portugali dhe emrin e nënës.
Përballë provave filmike dhe shkencore, Ruben Saraiva ka deklaruar:
“Unë e kuptoj akuzën. Ato janë të qarta, por nuk i pranoj.”
Ai ka mohuar njohjen e britanikut Harry James Simpson, ndërsa prokurorët e kanë pyetur se si e shpjegon praninë e gjurmëve biologjike (pështymë) që i përkisnin atij dhe Harry Simpson, të gjetura në bagazhin e automjetit me targa AA837ZM, i përdorur nga Edmond Haxhia.
Prokuroria pretendon se Simpson ka luajtur rolin e vëzhguesit të viktimës.
“Unë nuk e kam një përgjigje për pyetjen” ka thënë Ruben Saraiva.
Prokurorët i kanë paraqitur Ruben Saraivës një foto të nxjerrë nga një kamerë sigurie, e datës 19.04.2023, ku fiksua momenti i largimit të tij nga Shqipëria. “A e njihni drejtuesin e mjetit?” e kanë pyetur ata.
Përsëri Ruben Saraiva i ka bishtnuar përgjigjes duke thënë se :“ Unë nuk e shoh mirë këtë foton. Unë nuk e dalloj se kush është në drejtim të mjetit”.
Prokurorët kanë këmbëngulur të marrin një përgjigje nëse personi në foto ngjason me Edmond Haxhinë për të cilin prokurorët kanë arritur në përfundimin se ishte truri organizues i kësaj vrasje.
“Unë nuk e dalloj pra nuk e qartësoj dot” është përgjigjur Saraiva.
Pas pyetjeve të prokurorëve, Ruben Saraiva, i cili ishte angazhuar në vrasjen e Ardian Nikulaj, ka mbetur i heshtur kur u përball me provën tjetër shkencore, gjetjen në garazhin e shtëpisë së Edmond Haxhisë të një çamçakëzi, nga i cili është nxjerrë ADN-ja e tij.
Megjithatë, portugezi ka pranuar, në një mënyrë të zbehtë, njohjen me Edmond Haxhinë, pasi prokurorët i treguan pamjet filmike ku ai shfaqej duke marrë karburant me automjetin AA837ZM.
“Unë mund te kem qenë duke udhëtuar me Edmondin” është përgjigjur i akuzuari për vrasje në bashkëpunim Ruben Saraiva.
Në javët në vazhdim pritet nisja e procesit gjyqësor në gjykatën e Lezhës vetëm me Ruben Saivën në pritje të ekstradimit nga Britania e Madhe të Edmond Xhaxhisë dhe katër britanikëve të cilët ishin në rolin e vëzhguesve në këtë vrasje.
