Daut Hysen Laze, 49 vjeç, i shpallur në kërkim pas arratisjes nga Institucioni i Posaçëm Mjekësor në IEVP Lezhë, është arrestuar mbrëmjen e djeshme nga policia e Komisariatit nr. 6 në Tiranë.
Sipas burimeve zyrtare, ai është kapur në banesën e tij në zonën e Astirit, e cila prej dy javësh ishte vëzhguar nga forcat e rendit bazuar në informacione operative që sugjeronin rikthimin e tij të mundshëm.
Gjatë marrjes në pyetje, Laze ka pohuar se gjatë gjithë kohës së arratisë kishte lëvizur brenda Tiranës, duke qëndruar herë në Fresk, herë në Kombinat dhe Astir.
Ai tha se ishte strehuar në disa xhami të qytetit, duke përfituar nga atmosfera e muajit të Ramazanit, ku kishte gjetur ndihmë nga besimtarë të ndryshëm për t’i shpëtuar autoriteteve.
Pas arrestimit, ai është transferuar menjëherë në Drejtorinë e Policisë së Qarkut Lezhë, ku pritet të merret në pyetje nga Shërbimi i Kontrollit të Burgjeve lidhur me mënyrën e arratisë dhe identifikimin e personave që mund ta kenë ndihmuar.
Arratisja e Lazes është konstatuar më 4 shkurt 2025, gjatë ndërrimit të turneve dhe thirrjes së apelit në ambientet e institucionit mjekësor brenda burgut të Lezhës.
Ai ndodhej aty me vendim të Gjykatës së Tiranës, i dënuar për veprën penale “Dhuna në familje” dhe i urdhëruar të qëndronte në mjekim të detyruar që prej 16 nëntorit 2021.
Gjatë kohës në arrati, 49-vjeçari dyshohet se kishte ndryshuar pamjen fizike për të shmangur kapjen.
Hetimet janë ende në vijim për të zbuluar nëse ai ka pasur ndihmë nga bashkëpunëtorë apo nëse arratisja është lehtësuar nga ndonjë ndihmë e organizuar brenda apo jashtë institucionit ku qëndronte.
