Drejtuesi i Departamentit të Infrastrukturës në Partinë Demokratike (PD), Besnik Dervishi, ka mbajtur një deklaratë për mediat ku theksoi rëndësinë e protestës kombëtare të planifikuar për më 11 korrik. Dervishi shprehu se kjo protestë është kundër padrejtësive, nëpërkëmbjeve, vjedhjeve dhe arrogancës së pushtetit të Rilindjes.
“Të nderuar qytetarë! Opozita ka thirrur protestë kombëtare më 11 korrik, kundër padrejtësive, nëpërkëmbjeve, vjedhjeve dhe arrogancës së pushtetit të Rilindjes,” tha Dervishi. Ai nënvizoi se kjo protestë është një platformë për qytetarët për të ngritur zërin dhe për t’u ballafaquar me Edi Ramën për premtimet e pambajtura dhe dështimet në qeverisje.
Dervishi përmendi një sërë dështimesh dhe premtime të pambajtura nga qeveria aktuale, duke përfshirë:
• Mospërfundimi i projekteve infrastrukturore si Unaza e Tiranës, Rruga Qukës-Qafë-Plloçë dhe Rruga e Arbrit.
• Mospërfundimi i hekurudhës Durrës-Tiranë, e cila është premtuar disa herë dhe së fundmi për vitin 2023.
• Mbyllja e aeroportit të Kukësit, i cili ishte premtuar për fluturime ndërkombëtare dhe punësimin e banorëve të Kukësit.
• Rrezikimi i portit të Durrësit për shkak të PPP-ve korruptive për zhvendosjen e portit.
• Mungesa e furnizimit me ujë të pijshëm 24 orë, një premtim i përsëritur në çdo fushatë elektorale që nga viti 2013.
• Monopolizimi i tregut të telekomunikacionit, duke çuar në rritje tarifash dhe dëmtim të konsumatorëve.
• Shpërdorimi i 2.5 miliardë eurove të shqiptarëve në lyerje fasadash të ndërtesave në qendrat e qyteteve.
• Anashkalimi i detyrave të Kryeministrit nga Rama, duke u fokusuar në çështjet urbane dhe duke shkatërruar autonominë lokale.
• Dhënia e lejeve të ndërtimit nga Kryeministri, duke krijuar një mafi ndërtimi që ka shkatërruar mundësinë që Tirana të jetë një qytet i jetueshëm.
“Kush e gjen veten në këtë realitet të bashkohet me protestën e opozitës të enjten ora 20.00,” tha Dervishi, duke theksuar se kjo betejë nuk është për pushtet, por për kthimin e vendit në normalitet. “Vetëm të bashkuar në betejë ia dalim që të ndalojmë shpopullimin e Shqipërisë dhe shpëtimin e saj. O sot, o kurrë!”
