Shërbimi Meteorologjik Ushtarak ka paralajmëruar për vazhdimin e temperaturave të larta në Shqipëri edhe në fillim të javës së ardhshme. Sipas njoftimit të tyre, vala e të nxehtit tashmë ka përfshirë vendin, duke sjellë temperatura të paprecedenta.
Dje, termometri regjistroi vlerën 40 gradë në qytetin e Elbasanit, ndërsa sot pritet një rritje e mëtejshme e temperaturave. Në orët e mesditës, termometri parashikohet të arrijë deri në 42 gradë Celsius në zonat e ulëta të vendit.
“Edhe ditët në vijim pritet që kjo valë e të nxehtit të jetë prezente mbi vendin tonë. Temperaturat e larta do të na shoqërojnë deri në mesin e javës tjetër, ku ditën e hënë dhe ditën e martë temperaturat të shkojnë deri në 44 gradë Celsius,” thuhet në njoftimin e Shërbimit Meteorologjik Ushtarak.
Paralajmërimi vjen si një kujtesë për qytetarët që të jenë të kujdesshëm dhe të ndërmarrin masat e nevojshme për të mbrojtur veten dhe të tjerët nga efektet e dëmshme të temperaturave ekstreme. Autoritetet këshillojnë shmangien e ekspozimit të gjatë në diell, konsumimin e sasive të mjaftueshme të ujit dhe kërkimin e ndihmës mjekësore në rastet e emergjencave shëndetësore të shkaktuara nga i nxehti.
