Policia e Tiranës ka bërë publik planin e masave për garantimin e rendit dhe sigurisë gjatë derbit mes Tiranës dhe Partizanit, që do të luhet sot në orën 20:00, në stadiumin “Air Albania”.
Rrugët që do të jenë të bllokuara për qarkullim janë:
• Rruga “Lek Dukagjini”
• Rruga “Dervish Hima”
• Rruga “Gjergj Filipi”
• Rruga “Papa Gjon Pali II” (nga kryqëzimi me rrugën “Ismail Qemali” deri te stadiumi)
• Bulevardi “Dëshmorët e Kombit” (nga Presidenca deri në sheshin “Nënë Tereza”)
Itineraret e tifozëve:
• Tifozët e Tiranës do të grumbullohen përballë “Teatrit të Kukullave” dhe do të ndjekin itinerarin: bulevardi “Dëshmorët e Kombit” – rruga “Bajram Curri” – ETC – rruga “Papa Gjon Pali II” – qendra “Coin” – stadium.
• Tifozët e Partizanit do të lëvizin nga kryqëzimi i rrugës “Muhamet Gjollesha” me “Artan Lenja”, përgjatë rrugës “Muhamet Gjollesha” – rruga “Sulejman Delvina” – rruga “Ibrahim Rugova” (pas Presidencës) – sheshi “Frederik Shopen” – shkallët e universitetit – stadium.
Policia do të shoqërojë dhe monitorojë lëvizjet e tifozëve vetëm në rrugët e përcaktuara, duke mos lejuar devijime apo grumbullime jashtë itinerarit.
Tifozët do t’i nënshtrohen kontrolleve të rrepta fizike për sende të ndaluara si mjete të forta, çadra, çelësa metalikë, bidonë uji dhe lëndë piroteknike.
• Hyrja në stadium do të lejohet vetëm për personat me dokument identifikimi.
• Fëmijët nën 16 vjeç nuk do të lejohen pa praninë e një prindi ose kujdestari të pajisur me dokument identifikimi.
• Tifozët e evidentuar më parë si problematikë nga policia, nuk do të lejohen të hyjnë në stadium.
Policia bën apel për respektimin e masave për të garantuar një atmosferë të qetë dhe të sigurt gjatë zhvillimit të ndeshjes.
