Sekretari i Përgjithshëm i Partisë së Lirisë, Tedi Blushi, ka lënë ambientet e komisariatit nr.1 në Tiranë pas rreth 4 orësh, teksa ishte thirrur për të dhënë sqarime mbi incidentin e sotëm në sallën e Këshillit Bashkiak të kryeqytetit.
Në një deklaratë të bërë pas lirimit, Blushi denoncoi regjimin aktual dhe e quajti komisariatin “komisariatin e narkoshtetit”. Ai theksoi se incidenti ishte një provokim ndaj tij dhe se ai kishte dhënë një përgjigje të merituar.
“Prej rreth 4 orësh jam në komisariatin e narkoshtetit për të dhënë sqarime për atë ngjarje të shëmtuar, me atë provokim që m’u bë sot në mbledhjen e Këshillit Bashkiak të Tiranës, ku rrugaçëria mori përgjigjen e merituar siç e mori në dyert e këtij komisariati dhe siç do e marrë në çdo strofull të krimit,” deklaroi Blushi.
Blushi theksoi se Partia e Lirisë do të mbajë një qëndrim të ashpër kundër regjimit aktual, duke premtuar se përgjigja ndaj provokimeve do të jetë shembullore dhe e vendosur.
“Me këtë regjim ka zero tolerancë, ka vetëm qëndresë. Përgjigja do jetë shembullore në çdo strofull, komisariat. Kush do provokojë opozitën do marrë përgjigjen në mënyrë demokratike dhe shqiptare,” shtoi ai.
Kujtojmë se Valteri pretendoi se është goditur me grushta dhe sende të forta nga Blushi, ndërsa është raportuar se e ka kallëzuar në polici për dhunë Sekretarin e Përgjithshëm të PL-së.
