PD akuzon se djali i kryebashkiakut të Poliçanit, Adriatik Zotkaj, ka përfituar dy tendera pa garë në dy bashki të drejtuara nga socialistët.
Sipas një deklarate nga selia blu, Eno Bozdo, i deleguari politik i PD në Berat, tha se tenderat janë marrë nga bashkitë Përmet dhe Dimal përmes kompanisë “G&M Construction 07”, në pronësi të Zotkajt.
“Tenderi i marrë në Bashkinë e Përmetit ka të bëjë me punimet për rehabilitimin e rezervuarit Qilarisht. “Kompania ‘G&M Construction 07’ e fiton këtë garë në mungesë të plotë të konkurrencës, madje me ofertë thuajse 100% të fondit limit. Në të njëjtën procedurë, dy kompani me oferta më të ulëta skualifikohen paraprakisht nga gara, duke lënë të vetëm në garë kompaninë e djalit të Adriatik Zotkës, kryetarit të Bashkisë Poliçan.
Ajo çfarë e bën këtë skemë korruptive edhe më të rëndë, është fakti se nuk ndodh për herë të parë: në gusht të këtij viti, kryetarja e Bashkisë Dimal, Juliana Memaj i akordon kompanisë ‘G&M Construction 07’, pra kompanisë së djalit të Adriatik Zotkës, një tjetër tender publik- vazhdimi i shtresës së asfaltit në rrugën Drenovicë, përsëri me ofertë gati 100% të fondit limit dhe përsëri në mungesë të plotë të konkurrencë, d.m.th. me një garues të vetëm”, theksoi Bozdo.
“Brenda 4 muajsh pra, djali i kryebashkiakut të Poliçanit, Adriatik Zotkaj ka fituar dy tendera pa konkurrencë, me ofertë maksimale thuajse 100% të fondit limit”, vijoi më tej Bozdo.
