Një situatë shqetësuese ka ndodhur sot në Qendrën Spitalore Universitare të Tiranës “Nënë Tereza”, (QSUT), respektivisht në pavijonin e Infektivit i cili është kthyer që prej fillimit të pandemisë në Spitalin Covid-1.
Gjatë ditës së sotme janë publikuar shumë denoncime të qytetarëve dhe të afërmve të pacientëve të sëmurë, të cilët ehde kanë fotografuar disa ambulanca të mbushur me pacientë, të parkuara në oborrin e Spitalit Infektiv.
Skandali thellohet kur kuptohet se për shkak të tejmbushjes mbi kapacitete, në Spitalin Covid-1 është krijuar një kaos, ku pacientët “mbivendosen” me pacientë të tjerë.
Si pasojë ditën e sotme për shkak të tejkalimit të kapaciteteve, 8 autoambulanca me pacientë të sëmurë me Covid brenda ofrojnë shërbim ambulator në oborrin e Infektivit pasi nuk ka shtretër bosh.
Ndërkohë infeksionet vazhdojnë të rriten. Ministria e Shëndetësisë raportoi një ditë më parë 495 raste të reja me Covid-19, ndërsa 8 qytetarë humbën jetën, ndërsa sot 501 raste dhe dy viktima.
Sipas shifrave zyrtare që jep Ministria, në tre spitalet Covid, po trajtohen 352 pacientë, ku 9 prej të cilëve janë në terapi intensive dhe 4 janë të intubuar.
Mirëpo sipas fakteve në terren, po rezulton se shumica e pacientëve grumbullohen në Spitalin Infektiv dhe shpërndarja në spitalet e tjera Covid nuk po bëhet siç duhet, në mënyrë që të ekuilibrohen kapacitetet spitalore.
Kujtojmë se edhe opozita ka akuzuar gjithashtu qeverinë se përse e mban të fshehtë dhe nuk e hap Spitalin Covid-4, që është parashikuar të jenë hapësirat e ish-universitetit Kristal, në autostradë./GazetaReforma.com/
