Gjykata e Krimeve të Rënda të Foggias dënoi me burgim të përjetshëm 47-vjeçarin shqiptar, Taulant Malaj, për vrasjen e vajzës së tij 16-vjeçare, Jessica Malaj, dhe fqinjit Massimo De Santis, si dhe për plagosjen e rëndë të bashkëshortes, Tefta Malaj. Përveç dënimit maksimal, ndaj tij u vendos edhe masa e izolimit ditor për një vit e gjashtë muaj.
Vendimi u dha të premten, duke konfirmuar kërkesën e bërë nga Prokuroria më 30 maj. Ngjarja tragjike ndodhi më 7 maj 2023 në Torremaggiore të Foggias, ku Malaj e akuzoi gruan për një lidhje jashtëmartesore me fqinjin, një dyshim që sipas hetimeve nuk kishte bazë reale.
Sipas dosjes hetimore, Malaj e kishte pritur De Santis-in në hyrje të pallatit dhe e kishte qëlluar me thikë për vdekje, duke i shkaktuar 21 plagë. Më pas ishte kthyer në banesë për të vrarë edhe bashkëshorten. Vajza e tyre, Jessica, ndërhyri për të mbrojtur nënën, por u qëllua për vdekje nga i ati. Vajza ndërroi jetë gjatë rrugës për në spital, ndërsa Tefta u plagos rëndë me gjashtë goditje në bark.
Prokuroria sqaroi se Malaj e kishte planifikuar vrasjen të paktën një ditë më parë. Ai kishte vendosur kamera të fshehta në shtëpi për të monitoruar bashkëshorten dhe vajzën, duke ndjekur një supozim të pabazë mbi një marrëdhënie me fqinjin. Hetimet zbuluan se komunikimet midis Teftës dhe De Santis-it ishin thjesht përshëndetje formale mes fqinjësh.
Gjatë vrasjeve, një pjesë e ngjarjes u regjistrua në video me celular. Në pamje, Malaj dëgjohet teksa kërcënon bashkëshorten dhe shprehet se do të vriste edhe fëmijën e tyre më të vogël, atëherë rreth 5 vjeç. Pas masakrës, ai u largua nga banesa me duart ende të lyera me gjak dhe u arrestua nga policia pas një shëtitjeje në lagje. Përpara arrestimit, kishte telefonuar vëllain e tij dhe i kishte rrëfyer krimin.
Avokati i Tefta Malajt, Roberto De Rossi, deklaroi për Fanpage.it se klientja e tij i mbijetoi sulmit përmes një mrekullie. “Kjo është një nga gjakderdhjet më të rënda të 50 viteve të fundit sipas mendimit tim,” theksoi ai. Gjatë procesit gjyqësor u shfaqën pamje të sulmit, ndërsa Tefta dhe djali i vogël ndodheshin në një strehë dhe po marrin ndihmë psikologjike.
Mbrojtja e Malajt kërkoi të pranohej paaftësia mendore e pjesshme dhe pretendoi se ai nuk kishte synuar të vriste vajzën. Ata madje akuzuan stafin mjekësor për ndërhyrje të vonuar dhe kërkuan që ngjarja të kualifikohej si dëmtim personal me rrethana lehtësuese. “Sipas mënyrës si e paraqitën, ngjarja duhej të dënohej me vetëm 5 apo 6 vjet burg,” tha De Rossi. Megjithatë, gjykata e rrëzoi këtë argument dhe e dënoi Malajn me burgim të përjetshëm.
