Dënimi i parë për dhunë seksuale gjatë luftës, Kurti: Drejtësia është e domosdoshme, edhe kur vjen shumë vonë

Kryeministri i Kosovës, Albin Kurti ka reaguar me anë të një postimi në rrjetet sociale lidhur me dënimin e parë për dhunë seksuale gjatë luftës të dhënë ditën e sotme nga Gjykata e Prishtinës.

Sjellim në vëmendje se gjykata dënoi sot me 10 vite burg për dhunë seksuale gjatë luftës në Kosovë shtetasin serb, Zoran Vukotiç, ndërsa kryeministri Kurti paralajmëron se nuk mund të kenë̈ amnisti për këtë̈ krim. Kurti ndër të tjera ka thënë se drejtësia është e domosdoshme edhe në momente si ky kur vjen me shumë vonesë. Ai ka thënë ndër të tjera se viktimat e dhunës seksuale kanë nevojë për drejtësi dhe për përkrahje shoqëror.

Postimi i kryeministrit të Kosovës, Albin Kurti

Dhuna seksuale gjatë viteve 1998 – 99 është përdorur si mjet lufte në vazhdimësi në Kosovë. Mijëra gra e burra, vajza e djem kanë qenë viktima të këtij krimi. Ndërkaq dy dekada pas luftës, as edhe një person nuk është dënuar për një krim të tillë.

Sot, pas 23 vitesh pandëshkueshmëri për krimin e dhunës seksuale, për herë të parë dënohet dikush. Zoran Vukotiqi është dënuar me 10 vite burgim për rastin e ushtrimit të dhunës seksuale ndaj një gruaje shqiptare në Vushtrri.

Drejtësia është e domosdoshme, edhe në momente si ky kur vjen shumë vonë. Viktimat e dhunës seksuale kanë nevojë për drejtësi, por edhe për përkrahjen tonë shoqërore për të luftuar stigmën që i përcjellë.

Krimet e luftës nuk parashkruhen, dhe nuk mund të kenë amnisti për këtë krim të kryer gjatë luftës në Kosovë, këtë armë lufte të përdorur nga okupatori.