Kosova po kalon një periudhë të vështirë, pasi përveç epidemisë, prej muajsh po përballet edhe me krizën politike, e cila u thellua edhe me shumë me rënien e qeverisë Kurti.
Presidenti Hashim Thaçi ka deklaruar se vendi nuk mund të shkojë në zgjedhje të parakohshme për shkak të situatës dhe se kryeministri i ri do zgjidhet me shumicë votash nga Parlamenti.
Ai i ka kërkuar disa herë Kurtit dhe VV që t’i dërgojnë emrin e kandidatit për kryeministër, por deri tani nuk ka marrë asnjë përgjigje kurse Kurti ka deklaruar se në momente të tjera do nxiste protesta kombëtare.
Ditën e sotme, zëdhënësi i qeverisë në detyrë, Përparim Kryeziu deklaroi se po presin publikimin e dekretit nga Presidenti Hashim Thaçi për mandatarin për t’iu drejtuar Gjykatës Kushtetuese për interpretim.
Më tej, ai shtoi se mospublikimi i këtij dekreti është shprehje e gatishmërisë për të bërë veprime që janë ndesh me Kushtetutën.
“Jemi në pritje të këtij dekreti, përmbajtjen e këtij dekreti dhe referimi që bëhet nga Presidenti mbi hapat e tij drejt formimit të qeverisë dhe mbi këtë përmbajtje do t’i drejtohemi Gjykatës Kushtetuese. Ne kemi shprehur bindjen tonë dhe besojmë që interpetimi ynë është i drejt kur themi se veprimet e radhës të presidentit duhet të jenë ato që çojnë deri te shpallja e zgjedhjeve të parakohshme pasi që të kalojë pandemia dhe jo formimi i një qeverie të re”.
Në një intervistë për Tv Dukagjini, Kryeziu tha se po ashtu se do të kërkojnë opinion edhe nga Komisioni i Venecias
“Për një kërkesë për opinion do t’i drejtohemi edhe Komisioni të Venecias, duke qenë të bindur që një opinion prej një institucioni të pavarur do të ndihmojë në sqarimin e kësaj situate kushtetuese por në të njejtën kohë do t’i shërbente edhe vendimit të Gjykatës Kushtetuese ashtu që ai të jetë sa më i drejtë dhe sa më kredibil”.
Më herët ditën e sotme, u raportua se LDK dhe AAK kanë gjetur gjuhën e përbashkët dhe janë gati të bashkëpunojnë për të udhëhequr bashkë qeverinë, madje kanë përcaktuar edhe ministritë që ketë secila.
Kujtojmë se më 25 mars ‘qeveria Kurti’, e cila u formua 3 muaj pas zgjedhjeve të 6 tetorit, ra pas 51 ditësh në pushtet, duke u bërë qeveria më jetëshkurtër.
Pas një seance maratonë, Kuvendi votoi me 82 vota pro, 32 kundër dhe 2 abstenime për rrëzimin e qeverisë, pasi LDK inicioi ‘mocionin e mosbesimit’ duke u përkrahur nga të gjitha partitë opozitare dhe minoritetet, teksa të vetmit që votuan kundër ishte partia Vetëvendosja.
Shkak për “mocionin e mosbesimit” u bë shkarkimi i ministrit të Brendshëm Agim Veliu, pasi ai i doli kundër qeverisë dhe kërkoi shpalljen e gjendjes së jashtëzakonshme, duke përhapur panik.
