Ambasada amerikane ka reaguar pas deklaratave të bëra nga ish-kryeministri Sali Berisha, i cili tha se nuk ka asnjë prove, dokument ose fakt lidhur me akuzat nga sekretari amerikan i shtetit Blinkenm dhe shpalljen “non-grata” nga DASH. Me anë të një postimi në rrjetet sociale Ambasada amerikane ka shkruar se do të përdorë të gjitha instrumentet që ka në dispozicion, për t’u përballur me korrupsionin dhe pandëshkueshmërinë në Shqipëri.
Reagimi i plotë
“Midis urdhrit ekzekutiv të Presidentit Biden, shpalljes nga sekretari amerikan i shtetit Blinken, deklaratave të ambasadores Yuri Kim përpara shtypit, medias javën e kaluar dhe editorialit të saj këtë javë, qëndrimi i SHBA është i qartë dhe i pandryshuar: Lufta kundër korrupsionit përbën një interes thelbësor të sigurisë kombëtare të Shteteve të Bashkuara dhe ne do të përdorim të gjitha instrumentet që kemi në dispozicion për tu përballur me korrupsionin dhe pandëshkueshmërinë“.
Berisha u ndal edhe tek deklaratat e ambasadores amerikane Yuri Kim, i cila në takimin në selinë e PD me Lulzim Bashën i kërkoi këtij të fundit, të mos fusë Berishën në Parlament duke thënë: Dhe në fakt do ishte një ironi historike dhe tragjike nëse partia do duhej të hante bar për hatër të një deputeti të saj.
Berisha tha se PD duhet t’i kërkojë ambasadores Yuri Kim të kërkojë falje për këtë deklaratë.
