Ballkani nga hera është konsideruar si një “fuçi baruti”, por këtë herë janë deklaratat e presidentit të Serbisë për Kosovën ato që po i fryjnë një destabiliteti.
Por edhe pse situata në Kosovë ka ngjallur reagime nga qeveria e kësaj të fundit, në Shqipëri, qeveria e Edi Ramës, nuk është shprehur ende zyrtarisht për deklaratat luftarake të presidentit serb, Aleksandar Vuçiç, njëkohësisht mik i kryeministrit Rama.
Por duket se ish-kryeministri i “luftës”, aktualisht ministri i Shtetit për Diasporën, Pandeli Majko, ka thyer më në fund heshtjen e tij të gjatë dhe ka vendosur të pozicionohet kundër provokimeve serbe.
Ai është shprehur sot për “Euroneës Albania” se, deklarata e presidentit serb Aleksandër Vuçiç, nuk duhet parë si provokim, por është protokoll i vërtetë i marrëdhënies shqiptaro-serbe, një konflikt i ngrirë.
“Mendoj që nuk duhet parë si provokim apo retorikë, por një fakt që politika serbe po prodhon për rajonin. Aktualisht nuk mendoj se jemi duke parë ndonjë surprizë, por vazhdimësinë e një lloj papërgjegjshmërie, e cila u deklarua më së fundmi. Është protokoll i vërtetë i marrëdhënies shqiptaro-serbe, një konflikt i ngrirë”,- u shpreh ministri.
Ai theksoi më tej se, Serbia, është një nga shtet që po armatoset më shumë në rajon dhe se ky armatim, nuk beson se është për gjueti rosash.
“Besoj që cilido e ka parë që Serbia është një nga shtetet që po armatoset në mënyrën më të vrullshme në krahasim me vendet e rajonit.
Nuk besoj se ky armatim është për gjueti rosash. Është një politikë që i përgjigjet pikërisht kësaj që më fund u deklarua si protokoll i konfliktit të ngrirë.
Mendoj që teknologjia serbe për të krijuar fqinj me status gjysmë shtetëror duke filluar nga Bosnja tek Kosova dhe tani mesa duket do të kapë edhe Malin e Zi”,- tha ai.
“Duhet të jemi të sinqertë me veten dhe pastaj me BE-në. Mendoj që konflikti mes shqiptarëve dhe serbëve është një konflikt i ngrirë.
Është një konflikt që menaxhohet nga Moska dhe Vuçiç është thjesht një nënprodukt i kësaj politike. Mendoj që deklarimet e Moskës dhe ministrisë së Jashtme të Rusisë lidhur me shkuarjen në Hagë të drejtuesve të UÇK-së e vërteton shumë qartë këtë”,- tha ai më tej.
Majko nënvizoi se, në gjykatë o njëra o tjetra palë meriton të shkojnë, të dyja është absurde.
“Mendoj se të gjithë jemi të vetëdijshëm se ajo që po ndodh është goxha e rëndë. Tani ka filluar një proces gjyqësor, dhe të gjitha komentet tona do të ishin moment dobësie.
Dua të them se UÇK mund të ishte gjithçka, por kurrë nuk mund të akuzohet se ka funksionuar si një strukturë kriminale.
Një gjë duhet të jetë e qartë UÇK-ja ka pasur hesape të hapura me regjimin e Millosheviçit. O njëra o tjetra meriton të shkojnë në gjykatë. Të dyja është absurde”,- përfundoi Majko.
/GazetaReforma.com/
