Tirana prej kohësh po vuan nga ndërprerja e ujit në disa zona të saj.
Në lidhje me këtë situatë ka reaguar edhe ndërmarrja e Ujësjellës Kanalizimeve.
UKT sqaron se mbrëmjen e djeshme, si pasojë e një defekti në linjën e transmetimit në Bovillë, është dëmtuar tubi kryesor.
Për këtë arsye do të ketë kufizime në furnizimin me ujë në pjesën më të madhe të Tiranës, përfshi Astirin dhe Yzberishtin.
Gjithashtu UKT bën me dije se inxhinierët po punojnë intensivisht, në mënyrë që ky problem të zgjidhet sa më shpejt.
Reagimi i plotë:
Defekt në linjën e transmetimit në Bovillë, kufizime të furnzimit me ujë në disa zona të Tiranës
Ujësjellës Kanalizime Tiranë njofton qytetarët se mbrëmjen e djeshme, datë 19 shtator 2019, në linjën e transmetimit që shkon nga ujëmbledhësi i Bovillës deri në Impantin e Bovillës ka ndodhur një defekt i rëndë, ku ka pasur dëmtim të tubit kryesor.
Grupet tona dhe inxhinierët tanë kanë marrë masat e nevojshme dhe po punojnë intensivisht për të riparuar në kohë sa më të shkurtër defektin e ndodhur, edhe pse kushtet atmosferike të orëve të fundit nuk kanë qenë në favor të tyre.
Ujësjellës Kanalizime Tiranë njofton qytetarët se kufizimet e furnizimit me ujë do të vijojnë edhe gjatë ditës së sotme në zonat që preken nga ky defekt, pasi procesi i trajtimit të ujit dhe i shpërndarjes në rrjet kërkon një kohë të caktuar.
Kufizime të furnizimit me ujë do të ndihen në pjesën më të madhe të Tiranës si dhe në zonat e Yzberishtit dhe Astirit, të cilat tashmë furnizohen me ujë direkt nga Bovilla.
Ujësjellësi Tiranë njofton qytetarët se inxhinierët dhe grupet tona po punojnë maksimalisht për kthimin sa më parë të furnizmit normal me ujë në këto zona.
Falenderojmë qytetarët për mirëkuptimin dhe durimin!
