Ish-deputetja e LSI Silva Caka, ka komentuar për herë të parë zërat se ka debatuar në Presidencë me Ilir Metën dhe më pas me kryetaren e LSI kur ajo e delegoi në Njësinë 12 në Tiranë.
Caka, i ka mohuar këto zëra dhe i ka quajtur të pavërtetë. Ajo theksoi se do të largohet nga LSI-ja vetëm kur ajo të bëhet si Rilindja e sotme.
“Unë nuk kam dashur të përgjigjem fare për këtë tymnajë. Kjo është krijuar 30 minuta pas deklaratës së Kryemadhit, se vemjet e Bashkisë përpiqen ti tregojnë kryeministrit se punojnë. Nuk kam dashur ta zgjasë këtë sepse nuk meritojnë asnjë sqarim nga ana ime. Ata nuk marrin asnjë minutë nga koha ime.
Do ta bëj një sqarim se unë personalisht, unë do të largohem nga LSI, ditën që ajo do bëhet si Rilindja e sotme. Unë e quaj Rilindjen fajtore për gjithçka. Unë jam nënë e dy fëmijëve të vegjël dhe në asnjë mënyrë nuk kontribuoj në shkatërrimin e tyre. Unë nuk mund të japë kontributin tim për të shkatërruar Shqipërinë. Jo nuk është aspak i vërtetë debati me presidentin Meta”, tha Caka.
Mediat shpërndanë një lajm se para disa ditësh shërbimi i sigurisë së Gardës së Republikës brenda Presidencës, njoftoi urgjentisht komandën qendrore për një incident që ndodhte ndërkohë. Ndërkohë në protokollin e vizitorëve të Presidentit gjendej i shënuar vetëm emri i ish-deputetes së LSI-së Silva Caka.
Sipas artikullit, Caka ishte thirrur nga Ilir Meta dhe po i kërkohej llogari me tone të larta, pse nuk pranonte të punonte e të kandidonte në Njësinë Nr.4 në kryeqytet./Gazetareforma.com/
