Partia Demokratike ka mbledhur sot Kryesinë që prej orës 18:00, ndërsa nuk kanë munguar as debatet.
Mësohet se ka pasur përplasje mes drejtuesve dhe Sekretarit të Përgithshëm të PD, Gazment Bardhi në lidhje me mënyrën si është hartuar dokumenti i analizës së humbjes në zgjedhjet e 25 prillit. Në debatin e zbardhur nga Ballkan Web, mësohet se drejtuesi politik i qarkut të Korçës, Edmond Spaho ka shprehur pakënaqësi për analizën përfundimtare të rezultatit në këtë qark. Spaho ka thënë se objektivi është arritur dhe janë fituar 5 mandate.
“Aty në raport z.Bardhi thua që Korca nuk ka dale brenda pritshmërive? Si e shpjegon? Une kam bërë tjetër analizë. Kam marrë rezultatin më të mirë. Kam pasur objektiv 5 mandate, kam fituar 5 mandate”, mësohet të ketë thënë Spaho.
Pakënaqësi ka shprehur edhe Edi paloka, i cili ka thënë se në document del sikur dikush ka punuar mirë dhe një tjetër jo.
“Ky dokument nuk është realist. Nuk pasqyron atë që drejtuesit politik kane shkruar në raportet e tyre. Duhet ndryshuar dokumenti, nuk mund ta miratojme ne këtë mënyrë si është hartuar. Kështu del sikur njeri ka punuar mirë, një tjetër jo”, ka thënë Paloka.
Ndërkohë, Bardhi është shprehur se analiza është bërë sipas një plani të bërë nga konsulentët.
“Metodologjia e analizës nuk është bërë nga une, por është bërë sipas një plani të bërë nga konsulentet. Mbi bazën e asaj metodologjie është bërë analiza”, mësohet të ketë thënë Bardhi.
