Vazhdojnë debatet e ashpra në Komisionin Hetimor për nxjerrjen e të dhënave të sistemit TIMS, ku diskutimet janë përqendruar në çështje të ndjeshme që prekin sigurinë kombëtare dhe transparencën në punësimin e policëve.
Xhemal Qefalia theksoi se disa nga çështjet e trajtuara janë shumë sensitive dhe kanë impakt në sigurinë kombëtare. Ai nënvizoi rëndësinë e mbajtjes së dëshmive konfidenciale, duke thënë: “Disa çështje janë sensitive, që prekin sigurinë kombëtare dhe dëshmitë e tyre duhet të mbahen jo në publik. Infot për sigurinë kombëtare nuk dalin në mexhelis.”
Nga ana tjetër, deputeti Ervin Salianji kritikoi qëndrimin e Qefalisë dhe kërkoi më shumë transparencë në proces. “Mua më duket sikur nuk jeni këtu. E keni vendimmarrjen këtu, mos u fshihni si struci. Nuk bëni një dëshmi publike. Çfarë ka sekret këtu se janë punësuar policë paligjshëm. Çfarë ka sekret shtetëror, ku drejtori i sistemit TIMS mund të jetë përdorur nga grupet kriminale. Duhet transparencë, që në të ardhmen të kenë frikë të bëjnë këto veprime. Të kenë edhe përgjegjësi publike për atë që thonë. Do të mbajnë përgjegjësi një më një, kjo është e sigurt,” tha Salianji.
Komisioni Hetimor është ngritur për të hetuar pretendimet për përdorim të paligjshëm të sistemit TIMS dhe për të siguruar që të gjitha veprimet të jenë në përputhje me ligjin dhe interesin publik.
