Vrasja e dy vëllezërve Haxhia në Durrës ka për momentin dy autorë të dyshuar, të cilët janë arrestuar nga policia, teksa njëri prej tyre, Klevis Alla, ka pranuar të bashkëpunojë me policinë.
Kjo çështje ka ngjallur debat në emisionin “Opinion” mbrëmjen e sotme, ku ishin të ftuar gazetari Artan Hoxha dhe avokati i Altin Ndocit, Saimir Visha.
Sipas këtij të fundit, klienti i tij nuk ka asnjë lidhje me këtë ngjarje dhe ai nuk është i implikuar në asnjë prej provave të paraqitura nga policia, por është mbajtur në burg prej presionit të mediave.
Teksa gazetari Hoxha po përshkruante ngjarjen e ndodhur dhe faktet e ditura deri në këto momente duke iu referuar deklaratës së Drejtorit të Policisë, Ardi Veliu, avokati ndërhyri duke thënë se këto fakte janë të pavërteta dhe se gazetari nuk duhet të flasë në këtë mënyrë
Pjesë nga debati
Artan Hoxha: Unë nuk hyj te puna jote, nuk më intereson puna jote, as klienti yt.
Saimir Visha: Nuk mund të flasësh me këtë gjuhë, prezumoi njerëzit të pafajshëm njëherë..
Artan Hoxha: Ke një deklaratë të policisë së shtetit, pse si ke bë padi Ardi Veliut.
Saimir Visha: Unë t’i bëj padi?
Artan Hoxha: Po meqë ti po thua këto nuk janë të vërteta. Deklarata thotë janë ndaluar dy persona me këto prova
Saimir Visha: Mos i hidh benzinë zjarrit, nuk flitet kështu është gabim kështu si po flet.
Artan Hoxha: Ne nuk po fajsojmë njeri. Nuk mund të themi se ai djali është kot aty.
Saimir Visha: Po është kot aty duhet të dalë që sot. Nuk flitet dot në këtë mënyrë.
Artan Hoxha: Unë po të pyes për deklaratën e prokurorit , ti thua se nxjerr se është sekret hetimor, as unë nuk e nxjerr se është sekret hetimor.
Saimir Visha: Ca thua kështu se nuk flitet kështu…
Artan Hoxha: Ti po thua gjykata e ka lënë në burg se ka bërë presion media…
Saimir Visha: Po prandaj e kanë lënë.
Artan Hoxha: Mos u bëj qesharak.
Saimir Visha: Të flasim me qetësi.
Visha ka insistuar se i mbrojturi prej tij nuk është autor i vrasjes së dyfishtë të kryer më 27 prill në Durrës dhe për me tepër ka hedhur akuza ndaj drejtorit të policisë së Durrësit, si person që ka kryer shantazh në dhomat e izolimit.
“Nuk është autor i kësaj ngjarjeje. Nuk ka akuza. Nuk mund të marr përsipër një drejtor i policisë së Durrësit për të mat paaftësinë e tij lidhur me këtë ngjarje. Një drejtor policie që bën shantazh në dhomat e izolimit të Durrësit. Harrojeni këtë muhabet. Sa të ketë avokati do të ketë drejtësi, mos të kishte avokati mjaftonte një drejtor policie dhe çdo njeri do të ishte i prezumuar i fajshëm. Prezumoni pafajësinë”, tha Vishaj ndërsa këmbënguli mbi këtë argument.
Në ditën e ngjarjes, Besmir Haxhia, është takuar me Altin Ndocin dhe ky fakt është përmendur edhe nga Vishaj, i cili tha se mes dy familjeve ka raporte të mira dhe se i mbrojturi prej tij ishte i shokuar nga kjo akuzë.
