Departamenti Amerikan i Shtetit ka publikuar raportin vjetor mbi luftën kundër narkotikëve dhe pastrimit të parave, ku për Shqipërinë theksohet nevoja për intensifikimin e hetimeve.
Sipas raportit, shumica e rasteve të pastrimit të parave lidhen me trafikun e drogës, evazionin fiskal dhe korrupsionin.
“Shqipëria duhet të zbatojë ligjet ekzistuese dhe të zgjerojë kapacitetin e policisë dhe prokurorëve për t’u fokusuar te korrupsioni, pastrimi i parave dhe krimet ekonomike. Gjithashtu, duhet të zbatojë plotësisht reformën gjyqësore të nisur në vitet 2016-2017,” thuhet në raport.
DASH vlerëson punën e SPAK dhe përmend hetimet ndaj ish-kryeministrit Sali Berisha dhe ish-ministrit të Mjedisit, Lefter Koka.
Në raport përmendet hetimi i nisur nga SPAK ndaj Berishës në tetor 2023, pas akuzave për përfitimin e rreth 5 milionë dollarëve nga dhëndri i tij, ndërsa gjykatat kanë dënuar ish-ministrin Koka për korrupsion dhe pastrim parash.
Për sa i përket rregullimit të tregut financiar, DASH rekomandon përmirësimin e legjislacionit për institucionet e mikrokredive dhe monedhat dixhitale, si një masë për të parandaluar aktivitetet e paligjshme ekonomike.
