Në raportin vjetor të Departamentit amerikan të Shtetit (DASH) për terrorizmin në botë, për vitin 2023, thuhet se dhjetë shtetas të Kosovës vazhdojnë të qëndrojnë në kampet e personave të zhvendosur dhe në qendrat e ndalimit në Siri.
Për 70 shtetas të tjerë kosovarë, nuk ka informacione në lidhje me vendndodhjen e tyre ose nëse janë gjallë.
Raporti thekson se, që nga shpërthimi i konfliktit në Siri në vitin 2011, rreth 350 kosovarë kishin udhëtuar drejt Sirisë dhe Irakut për të luftuar krah grupeve ekstremiste, kryesisht Shtetit Islamik (IS).
Pas kthimit të disa prej tyre, autoritetet kosovare i kanë ndjekur ata nëpërmjet proceseve gjyqësore, duke përfshirë edhe arrestimin e 12 shtetasve të Kosovës që kishin qenë në Siri.
Kosova ka miratuar një ligj të posaçëm në vitin 2015 për të sanksionuar pjesëmarrjen në luftëra të huaja, ndërsa Kodi Penal i Kosovës parashikon dënime për veprat terroriste që variojnë nga pesë vjet deri në burgim të përjetshëm.
Megjithatë, raporti thekson se dënimet për këto vepra janë shpesh të buta, duke përfshirë lirime me kusht dhe lirime të parakohshme, si dhe mbikëqyrje të dobët pas përfundimit të dënimit.
Zyrtarët e Shërbimit Korrektues të Kosovës kanë bërë me dije se, pas përfundimit të proceseve gjyqësore, rreth 42 persona për pjesëmarrje në luftëra të huaja kanë kaluar përmes institucioneve korrektuese, dhe aktualisht shtatë prej tyre janë të burgosur.
