Deputetja e PD-së, Dhurata Çupi, ka cilësuar nismën për ofrimin e 530 kredive për shtëpi pa interes për administratën si një praktikë anti-demokratike që dëmton besueshmërinë në zgjedhje.
Ajo ka deklaruar se ky vendim i qeverisë është një shkelje flagrante e rregullave për garë të barabartë, duke shtuar se paratë për këto kredi, përfshirë interesat, do të paguhen nga qytetarët me taksat publike.
Çupi kërkoi një reagim të shpejtë nga institucionet përgjegjëse, ndërsa akuzoi KQZ-në dhe Prokurorinë e Posaçme për heshtje dhe pasivitet në këtë çështje.
Postimi i plotë:
Heshtja nuk zgjidh, përkeqëson!
Vendimi i fundit i qeverisë për të trajtuar me kredi pa interes qindra punonjës të administratës përbën një shkelje flagrante të rregullave për garë të barabartë në zgjedhje. Interesi për 530 kredi për shtëpi nuk do të paguhet as nga xhepi i Edi Ramës, as nga xhepi i Blendi Gonxhes. Ato janë para publike, që po përdoren para zgjedhjeve.
Institucionet që duhet të ishin më aktivë gjatë kësaj periudhe zgjedhore për të kundërshtuar aktet elektorale të qeverisë heshtin.
KQZ bën sikur nuk shikon.
SPAK bën sikur nuk kupton.
Ligji dhe barazia zgjedhore po grisen para syve të shqiptarëve dhe partnerëve tanë, duke dëmtuar pozicionin e Shqipërisë në negociatat për anëtarësim në Bashkimin Europian.
Të tilla praktika antidemokratike, që janë bërë të zakonshme për këtë qeveri, kanë minuar besimin e qytetarëve tek zgjedhjet, prandaj është koha që institucionet të mos bëhen palë me shkeljet e ligjit, por të reagojnë dhe të tregojnë së ligji zbatohet njësoj për të gjithë!
