Ministri i Brendshëm, Bledi Çuçi me anë të një postimi në rrjetet sociale ka paralajmëruar se javën e ardhshme do të nisë shembja e ndërtimeve pa leje nga Velipoja në Ksamil. Gjithashtu ministri ka theksuar se masat ndëshkuese janë ashpërsuar dhe se prekin të gjithë zinxhirin e ndërtimit nga investitori deri tek punonjësit e kantiereve apo edhe oficerët e policisë e inspektorët e IKMT-së.
Gjithashtu Çuçi ka paralajmëruar se nuk do të ngelen pa ndëshkuar edhe ata të cilët kanë prekur zonat e mbrojtura dhe akset kombëtare.
Postimi i plotë i ministrit Bledi Çuçi
Javën e ardhshme do të nisim fillimisht me shembjen e ndërtimeve pa leje në vijën bregdetare nga Velipoja deri në Ksamil, për të çliruar çdo hapësirë të zaptuar dhe për të vënë para përgjegjësisë shkelësit e ligjit. Më tej është radha e atyre që kanë ndërhyrë në zonat e mbrojtura dhe akset kombëtare. Policia e Shtetit dhe IKMT kanë bërë bërë evidentimin e ndërtimeve dhe çdo strukture tjetër të ngritur pa leje në të gjithë territorin e vendit. Ndryshe nga herët e kaluara, kësaj radhe pas ndryshimit të Kodit Penal, masat ndëshkuese janë ashpërsuar dhe prekin të gjithë zinxhirin e ndërtimit nga investitori deri tek punonjësit e kantiereve apo edhe oficerët e policisë e inspektorët e IKMT-së që mund të kenë mbyllur sytë teksa ndërtohej pa leje. S’ka kohë për pushim
