Një infermiere meksikane u bë personi i parë në Amerikën Latine që mori vaksinën koronavirus kur vendi i saj filloi programin e vaksinimit të enjten.
Meksika ka marrë një dërgesë fillestare prej 3,000 doza të vaksinës Pfizer-BioNTech. Vendi ka një nga numrat më të lartë të vdekjeve nga pandemia në botë, pas SH.B.A., Brazilit dhe Indisë.
Të enjten edhe Kili dhe Kosta Rika gjithashtu, filluan administrimin e Pfizer-BioNTech. Argjentina planifikon të fillojë vaksinimet në ditët e ardhshme, por ka zgjedhur vaksinën e prodhuar ruse Sputnik V për fazën e saj fillestare, me një shpërndarje prej 300,000 dozash që mbërritën në kryeqytetin Buenos Aires të enjten në mëngjes.
Brazili, i cili ka regjistruar numrin më të lartë të vdekjeve në rajon, nuk do të fillojë deri në mes të shkurtit vaksinimet, megjithë një rritje të fundit në numrin e rasteve.
Presidenti Jair Bolsonaro thotë se nuk po planifikon të vaksinohet. Ai beson se ka zhvilluar imunitet kundër koronavirusit, ndërsa doli pozitiv në fillim të këtij viti.
“Ne duhet të vazhdojmë tutje”
Në Meksikë, María Irene Ramirez, 59 vjeç, shefe e njësisë së kujdesit intensiv në Spitalin “Ruben Leñero” në Mexico City, ishte e para që doli vullnetare për t’u vaksinuar.
“Kemi frikë, por duhet të vazhdojmë tutje … dhe unë dua të qëndroj në vijën e zjarrit”, tha ajo më pas, sipas gazetës “El Universal”.
3.000 dozat e para – nga 34 milionë të blera – mbërritën në Meksikë të mërkurën nga Belgjika, ku ato janë duke u prodhuar.
Pamjet e nisjes u transmetuan gjatë konferencës së shtypit në mëngjes të Presidentit Andrés Manuel López Obrador.
Qeveria meksikane thotë se dëshiron të vaksinojë të gjithë punonjësit shëndetësorë që luftojnë pandeminë deri në fund të tremujorit të parë të 2021.
Vendi ka regjistruar më shumë se 1.3 milionë infeksione deri më tani, me të paktën 121,000 vdekje të lidhura me Covid, sipas universitetit “Johns Hopkins”.
Kili ka pasur gati 600,000 raste të konfirmuara dhe më shumë se 16,300 vdekje; Kosta Rika – gati 163,000 raste dhe mbi 2,000 vdekje; dhe Argjentina – gati 1.6 milion raste dhe më shumë se 42,300 vdekje.
Presidenti i Kilit, Sebastian Piñera, përshkroi fillimin e programit kombëtar të imunizimit të koronavirusit të vendit të tij si një moment shprese.
Pse Argjentina po bën një vaksinë ruse?
Autoritetet shëndetësore të Argjentinës në fillim të kësaj jave i kishin dhënë vaksinës Sputnik V të Rusisë autorizimin “urgjent” – kombi i parë i Amerikës Latine që e bëri këtë.
Të enjten, 300,000 dozat e para u transferuan nga Moska në Buenos Aires.
Presidenti argjentinas Alberto Fernández është zotuar të marrë një vaksinë Sputnik V për të provuar se vaksina është e sigurt pas kritikave në Perëndim dhe në Rusi se ajo ishte regjistruar para provave klinike në shkallë të gjerë.
“Kishte një farë skepticizmi, por siç themi gjithmonë ne nuk duam të ngatërrohemi në asnjë lloj diskutimi përveç ruajtjes së shëndetit të argjentinasve,” tha ministri i kabinetit Santiago Cafiero.
Rusia ka hedhur poshtë kritikat, duke akuzuar Perëndimin për përpjekjen për të hequr qafe një rival në tregun fitimprurës të vaksinave në botë.
/Gazetareforma.com/
