Pak minuta më parë kryebashkiaku i Tiranë, Erion Veliaj ka njoftuar se ka zhvilluar një mbledhje online me Këshillin Bashkiak dhe kanë vendosur që të falen qiratë për familjet e strehuara në banesa sociale.
Ndër të tjera Veliaj ftoi këdo që jep hapësira me qira, ta falë pagesën për marsin e prillin, duke pasur parasysh se s’kanë pasur aktivitet ekonomik.
“Do t’ju marr vetëm një moment për të njoftuar një vendim shumë të rëndësishëm të Këshillit Bashkiak. Monetalisht Këshilli Bashkia është mbledhur për të vendosur faljen e qirave për të gjithë ata që marrin me qira banesa sociale, apartamente nga Bashikia Tiranë për muajt mars dhe prill. Përfitojnë 385 familje. Unë e kuptoj që krahasuar me mijëra familje që jetojnë në Tiranë me qira, ky është një kontribut modest, por donim që të jepnim ne shembullin e parë të faljes së qirasë për muajt mars dhe prill dhe nëse do jetë nevoja në varësi sesa vazhdon kjo krizë, edhe për muajt e tjerë.”- tha Veliaj.
Ky vendim vjen pasi më herët ditën e sotme ministrja e Shëndetësisë Ogerta Manastirliu dha një deklaratë për mediat, ku foli edhe rreth përfitimit të ndihmës ekonomike, duke theksuar se aplikimi do të realizohet online ose përmes shërbimit postar.
Ajo gjithashtu sqaroi qytetarët se do përfitojnë dyfishim të masës së ndihmës ekonomike rreth 64 mijë familje.
Manastirliu: 64 mijë familje do të përfitojnë nga ndihma ekonomike. Ja si do bëhet shpërndarja
Ditën e sotme Shqipëria u fut në karantinë pa afat, pasi qeveria vendosi që të gjitha institucionet arsimore (përfshirë edhe çerdhet), do të qëndrojnë mbyllur deri në përfundimin e gjendjes së epidemisë të shkaktuar nga COVID-19.
Ndërkohë mësimi për të gjithë nxënësit vijon online, ndërsa ministrja Besa Shahini deklaroi dje se provimet e Maturës Shtetërore nuk do të shtyhen por maturantëve do t’u bëhet favorizim, duke mos u pyetur në provim lidhur me leksionet që kanë marrë që nga koha kur janë izoluar në shtëpi.
Po ashtu edhe klinikat dentare do të jenë të mbyllura pas 3 prillit kurse spitalet publike dhe jopublike nuk do lejojnë të kryejnë operacione kirurgjikale.
Nuk do të lejohen grumbullimet masive në ambientet të hapura dhe të mbylluar kurse Komisionet e vlerësimit të KEMP-it nuk funksionojnë por qytetarët që nuk kanë mundësi të paraqiten do të vijojnë të marrin pagën e paaftësisë për punë.
