Në spitalin Infektiv është shënuar sot numri më i ulët i urgjencave në 24 orë, që kur në Shqipëri mbërriti koronavirusi një muaj më parë.
Deri tani ka mbërritur në spitalin COVID 1 vetëm një person rreth 50- vjeçar, teksa një javë më parë mbërrinin 10-12 urgjenca në ditë.
Po ashtu, sot nuk ka pasur asnjë pacient me komplikacione të dërguar nga COVID-1 në COVID-2 ose spitali ”Shefqet Ndroqi” që tashmë pret edhe rastet më të rënda, raporton News 24.
Në spitali Infektiv janë 52 pacientë, 5 nga të cilët në terapi intensive, kurse në COVID-2 janë 4 të intubuar të gjithë të moshuar dhe mbi 12 persona të prekur nga pneumonia bilaterale që shkaktohet zakonisht nga koronavirus, por testi i parë i tyre ka rezultuar negativ.
Tashmë ka shkuar në 409 numri total i të prekurve nga COVID-19 në vendin tonë, pasi gjatë 24 orëve të fundit janë shënuar vetëm 9 raste të reja pozitive, nga 234 testime të kryera.
Numri ka rënë sërish sepse dje u raportuan 17 raste të reja, teksa për të tretën ditë radhazi nuk është shënuar asnjë viktimë, duke e lënë në 22 numrin e të vdekurve.
Nga ana tjetër numri i të shëruarve ka shkuar në 164, një shifër goxha e lartë sipas ekspertëve.
