Qeveria çeke ka vendosur ashpërsimin e masave kufizuese në kuadër të frenimit të përhapjes së pandemisë së covid-19.
Mbrëmjen e së hënës, autoritet çeke njoftuan se nga nesër , të gjitha restorantet, baret dhe klubet do të mbyllen deri më 3 nëntor. Të gjitha shkollat, përveç kopshteve, do të mbyllen deri më 2 nëntor dhe do të kalojnë në mësime online. Sa i përket tubimeve të njerëzve në publik, do të kufizohen në gjashtë persona .
Vendimi i Republikës çeke vjen pas rritjes të së infektuarve me covid-19. Vendi ka regjistruar javët e fundit rritjen më të shpejtë të të infektuarve në Europë.
Qeveria çeke javën e kaluar vendosi mbylljen e palestrave, pishinave, kinemave, teatrove dhe muzeve.
Kryeministri çek, Andrej Babis, sqaroi se më 3 nëntor masat do të rivlerësohen, në bazë të situatës epidemiologjike të vendit .
Javën e kaluar, Çekia regjistroi rekord të të infektuarve me koronavirus . Brenda një dite mbi 8,600 njerëz rezultuan pozitiv ndaj virusit. Numri i pacientëve të shtruar në spitale është rritur për 76 për qind, përkatësisht në mbi 2,000.
Deri më tani vendi ka regjistruar mbi 121,400 të infektuar me covid-19
Ndërkohë 1,051 kanë humbur betejën me virusin.
/Gazetareforma.al/
