Deri më tani nga COVID-19 janë prekur 41 mjekë e infermierë nga Tirana, Durrësi, Lushnja dhe Korça.
Specialistja e ISHP, Silva Bino, bëri me dije se gjysma e tyre tashmë janë shëruar.
“41 raste nga stafi mjekësor, kryesisht nga Tirana, Durrësi, Korça dhe Lushnja, nga një rast. Dhe në Tiranë, gjysma e tyre është e shëruar”, tha Bino.
Ndër të tjera ajo tha se gjatë javës së fundit nuk janë regjistruar vatra komunitare, por vetëm familjare.
“Në Tiranë ka disa vatra infeksioni, janë kryesisht vatra familjare, nuk janë transmetime të gjëra komunitare. Në dy javët e para kemi pasur raste apo grupime të lidhur me një person që kishte udhëtuar, në ditët e fundit jo, por kryesisht vatra familjare”, u shpreh Bino.
Specialistja e ISHP tha se në mesin e të prekurve janë edhe gra shtatzëna, gjendja e të cilave është e mirë.
Bilanci i COVID-19 në vendin tonë është 383 të prekur, në mesin e të cilëve 131 të shëruar dhe 22 viktima.
Ditën e sotme u shënuan vetëm 6 raste të reja nga 182 teste të kryera, shifra më e ulët kjo në 2 javët e fundit.
