Greqia ka regjistruar një rekord negativ nga COVID-19 në 24 orët e fundit. Shifrat janë rritur ndjeshëm, pasi nga mbi 63 mijë teste, 3 mijë e 465 të infektuar u shënuan.
Po ashtu 56 pacientë ndërruan jetë nga COVID-19. Shqetësuese vijon të mbetet situata edhe nëpër spitale, ku janë plot 630 të intubuar.
Kujtojmë se prej disa javësh, në shtetin fqinj masat anti-covid janë shtrënguar duke e çuar vendin në një mbyllje të dytë.
Një ndër sektorët më të goditur është ai ekonomisë. Kujtojmë se sipas analizave të kryera nga ekspertët e ekonomisë, ajo e Greqisë do të tkurret me rreth 5 deri në 9 për qind këtë vit, sipas skenarit më të keq, e goditur nga masat kufizuese për të frenuar përhapjen e koronavirusit në vend.
Greqia ka qenë në një rrugë rikuperimi pas një krize 10-vjeçare të borxhit që rrënoi ekonominë me një të katërtën. Ajo u rrit me 1.9 për qind vitin e kaluar, e ndihmuar nga lulëzimi i turizmit, i cili gjithashtu pritej të merrte një hov të madh këtë vit.
Parashikimet e IOBE ishin në përputhje edhe me parashikimet e fundit nga Fondi Monetar Ndërkombëtar, i cili vlerësoi se ekonomia e Greqisë do të tkurrej me 10 për qind këtë vit, duke çuar papunësinë në 22.3 për qind nga 16.4 për qind që ishte në janar.
