Teksa vendi po përballet me një rritje ‘stratosferike’ të çmimeve në përgjithësi, edhe produktet e bulmetit nuk i kanë “shpëtuar trendit”.
Në Elbasan rritja e çmimeve të nënprodukteve të qumështit është shumë e evidentueshme, duke ndikuar në uljen e konsumit. Theksojmë se çmimet qëndrojnë në “tavan” gjatë gjithë kohës, përveç disa rasteve kur tregtarët duan të shesin shpejt produktet e furnizimit të vjetër.
Sipas një tregtare në markatën e qytetit të Elbasanit çmimi i bulmetit është rritur ndjeshëm, pasi fermerët po heqin dorë cdo ditë nga mbarështrimi i bagëtive. Për shkak të çmimeve të larta ka rënie së fuqisë blerëse.
“Djathi i bardhë dhe kaçkavalli kanë pësuar rritje, është rritur nga 3300, ka vajtur 6 tani. Ka ndikuar të ulja e shitjes. Nuk ka punë“- tha ajo për “Fax News”. Ata që preken drejtpërdrejt nga rritja e çmimeve janë konsumatorët, të cilët pohojnë se këto produkte të domosdoshme nuk po i blejnë dot më si më parë. Edhe pse shqiptarët e konsumojnë masivisht bulmetin cmimet e reja nuk ua mundësojnë dicka të tillë.
“Jo se përballojmë, nuk marrim fare. Po vijmë vërdallë e s’po blejmë gjë. Çmimet në qiell, me siklet ia bëjmë. Janë rritur të gjitha. 10 mijë lekë një kile djath, nuk blej hiç.Me 70 mijë lekë pension të kalosh muajin”– janë shprehur qytetarët për gazetaren e Faxnews Entela Duka.
Rritje të çmimit ka pësuar vecanërish djathi i deles dhe ai kaçkavall. Përballë kësaj situate qytetarët apelojnë për vëmendje të shtuar në sektorin e blegtorisë si një ndër sektorët jetik te vendit.
